कोरोनाचा धोका वाढला

नागपूर : कोरोनाचा प्रादुर्भाव वाढतच चालला आहे. दैनंदिन रुग्णसंख्येने गुरुवारी पुन्हा उच्चांक गाठला. १० ऑक्टोबरनंतर पहिल्यांदाच ६४४ नव्या कोरोनाबाधितांची नोंद झाली. ६ रुग्णांचा जीव गेला. रुग्णांची एकूण संख्या १४१०२८ झाली असून मृतांची संख्या ४२५३ वर पोहचली. विशेष म्हणजे, सध्याच्या घडीला ५ हजारावर कोरोनाचे रुग्ण सक्रिय आहेत.

नागपूर जिल्ह्यात ऑगस्ट व सप्टेंबर महिन्यात दैनंदिन हजारावर गेलेली रुग्णसंख्या ऑक्टोबर महिन्यात कमी होऊ लागली होती. ५०० ते ७०० दरम्यान रुग्ण दिसून येत होते. नोव्हेंबर महिन्यात दैनंदिन रुग्णसंख्या आणखी कमी होऊन २००च्या खाली आली होती. डिसेंबर महिन्यात मात्र यात किंचित वाढ होऊन ३५० ते ४०० दरम्यान तर जानेवारी महिन्यात ४०० ते ४५० दरम्यान रुग्णसंख्या गेली. फेब्रुवारी महिन्याचा पहिल्या आठवड्यात २५० ते ३५० दरम्यान असलेली रुग्णसंख्या ११ फेब्रुवारीला ५०० वर गेली. तेव्हापासून सलग सहा दिवस बाधितांची संख्या ४००वर तर तीन दिवस ५०० वर होती. आज ६०० वर गेली असून पुढील काही दिवसात यात आणखी वाढ होण्याची शक्यता तज्ज्ञानी वर्तवली आहे.

-आरटीपीसीआर व अँटिजेन मिळून ६७७५ चाचण्या

४३४९ आरटीपीसीआर तर २४२६ रॅपीड अँटिजेन मिळून आज ६७७५ कोरोना संशयित रुग्णांच्या चाचण्या करण्यात आल्या. यात आरटीपीसीआरमधून ६२३ तर अँजिटेनमधून २१ रुग्ण पॉझिटिव्ह आले. सर्वाधिक, १०६२ चाचण्या मेडिकलच्या प्रयोगशाळेत करण्यात आल्या. आतापर्यंत नागपूर जिल्ह्यात ११४४५९३ चाचण्या झाल्या.

-शहरात ५७४, ग्रामीणमध्ये ६७ बाधित

आज पॉझिटिव्ह आलेल्या रुग्णांमध्ये शहरात ५७४, ग्रामीणमध्ये ६७ तर जिल्हाबाहेरील ३ रुग्ण आहेत. मृतांमध्ये शहरात ३, ग्रामीणमध्ये १ तर जिल्हाबाहेरील ३ मृत्यू आहेत. आतापर्यंत शहरात ११२४८९ रुग्ण व २७५६ मृत्यू, ग्रामीणमध्ये २७६२२ रुग्ण व ७६२ रुग्णांचे बळी गेले. आज २५० रुग्ण बरे झाले असून आतापर्यंत १३१६७० रुग्णांनी कोरोनावर मात केली.

-अ‍ॅक्टीव्ह रुग्णांच्या वाढत्या संख्येने वाढवली चिंता

नागपूर जिल्ह्यात दरम्यानच्या काळात रुग्णसंख्या रोडावली असलीतरी अ‍ॅक्टीव्ह म्हणजेच सक्रिय रुग्णांची संख्या ३००० ते ४००० दरम्यान कायम होती. गुरुवारी ही संख्या ५१०५वर गेल्याने चिंता वाढली आहे. यातील १६१२ रुग्ण रुग्णालयात तर ३४९३ रुग्ण गृह विलगीकरण म्हणजे होम आयसोलेशनमध्ये आहे.

-दैनिक चाचण्या : ६७७५

-बाधित रुग्ण : १४१०२८

_-बरे झालेले : १३१६७०

- उपचार घेत असलेले रुग्ण : ५१०५

- मृत्यू : ४२५३