नागपूर : महानगरपालिकेच्या अतिक्रमणविरोधी पथकाने सोमवारी गांधीबाग आणि मानेवाडा परिसरात फुटपाथवरील अतिक्रमणाविरोधात कारवाई केली. दिवसभराच्या मोहिमेत २ ट्रक सामान जप्त करण्यात आले. दोन पथकांनी ही कारवाई केली.
पहिल्या पथकाने हनुमाननगर झोन अंतर्गत तुकडोजी पुतळा चौकापासून तर मानेवाडा चौक आणि बेसा चौकापर्यंतचे अतिक्रमण हटविले. या सोबतच शताब्दी चौकातही कारवाई करण्यात आली. येथून एक ट्रक भरून सामान जप्त केले.
दुसऱ्या पथकाने लकडगंज झोन कार्यालयामागील जय सीताराम अपार्टमेंटला लागूनच असलेल्या नवाज गॅरेजमधील वाहने हटविली. बडकस चौक ते रुईकर रोडपर्यंत फुटपाथवरील ३५ अतिक्रमणे हटविण्यात आली. गुरु गोविंदनामक कपडा दुकानाचे फुटपाथवर ठेवलेले तीन स्टॅच्यू जप्त करण्यात आले. यानंतर गांधीबाग बागेपासून तर नंगा पुतळा चौक आणि इतवारी पोस्ट ऑफिसपर्यंतच्या मार्गावरील दोन्ही बाजूला लागलेले फेरीवाल्यांचे हातठेले हटविण्यात आले. या कारवाईत एक ट्रक सामान जप्त करण्यात आले. उपायुक्त अशोक पाटील, निरीक्षक संजय कांबळे यांच्या मार्गदर्शनात राहुल रोकडे, विशाल ढोले व पथकाने ही कारवाई केली.