नागपूर : कोरोना व्हायरसच्या नव्या प्रजातीमुळे युरोपमध्ये खळबळ उडाली असताना नागपूर जिल्ह्यात मात्र दिवसागणिक कोरोनावर मात करणाऱ्या रुग्णांचे प्रमाण वाढत आहे. सध्या हे प्रमाण ९३.४६ टक्क्यांवर गेले आहे. शुक्रवारी ३२० नवे बाधित रुग्ण आढळून आले तर ६ रुग्णांच्या मृत्यूची नोंद झाली. रुग्णांची एकूण संख्या १२१६६६ झाली असून मृतांची संख्या ३८८४ वर पोहचली आहे. विशेष म्हणजे, पॉझिटिव्ह रुग्णांच्या तुलनेत अधिक, ३९८ रुग्ण बरे झाले.
नागपूर जिल्ह्यात चाचण्यांची संख्या व रुग्णांची संख्या स्थिर असल्याचे दिसून येत आहे. मागील सहा दिवसात ४०००ते ४५०० दरम्यान चाचण्या झाल्या तर, ४५० ते ३५० दरम्यान रुग्णांची संख्या नोंदविण्यात आली. आज ३८४६ आरटीपीसीआर व ४४२ रॅपीड अँटिजेन अशी एकूण ४२८८ संशयित रुग्णांची चाचणी करण्यात आली. पॉझिटिव्ह आलेल्या रुग्णांमध्ये शहरातील २७१, ग्रामीणमधील ४६ तर जिल्हाबाहेरील ३ रुग्णांचा समावेश आहे. मृतांमध्ये शहरातील २, ग्रामीण मधील १ तर जिल्हाबाहेरील ३ रुग्णांचा मृत्यू झाला. कोरोनावर मात केलेल्या रुग्णांची संख्या ११३७०५ वर पोहचली आहे. विशेष म्हणजे, ऑक्टोबर महिन्यात बरे होणाऱ्या रुग्णांचे प्रमाण ९४ टक्क्यांवर पोहचले होते. डिसेंबर महिन्याच्या तीन आठवड्यात हे प्रमाण ९१ टक्क्यांवर आले होते. आता पुन्हा ते ९३ टक्क्यांवर गेले आहे. सध्या नागपुरात ४०७७ रुग्ण उपचार घेत आहेत. यातील १२८२ रुग्ण रुग्णालयात तर २७९५ रुग्ण होम आयसोलेशनमध्ये आहे.
-विदेशातून परतलेल्या चार प्रवाशांना इन्स्टिट्युशनल क्वारंटाईन
मध्य पूर्व येथून प्रवास केलेले चार प्रवासी शुक्रवारी नागपूरच्या डॉ. बाबासाहेब आंबेडकर आंतरराष्ट्रीय विमानतळावर पोहचले. खबरदारीचे उपाय म्हणून त्यांना अल झमझम हॉटेलमध्ये संस्थात्मक विलगीकरण म्हणजे इन्स्टिट्युशनल क्वारंटाईन करण्यात आले. आजपासून पाच ते सातव्या दिवसाच्या दरम्यान या चौघांची आरटीपीसीआर चाचणी केली जाणार आहे. अहवाल निगेटिव्ह आल्यास होम क्वारंटाईन केले जाईल. अहवाल पॉझिटिव्ह आल्यास मेडिकलमधील स्वतंत्र कक्षात ठेवले जाईल.
कोरोनाची आजची स्थिती
संशयित रुग्ण-४२८८
बाधित रुग्ण- १२१६६६
बरे झालेले रुग्ण-११३७०५
उपचाराखाली रुग्ण-४०७७
मृत्यू-३८८४