नागपूर : एसटी बसमध्ये प्रवासादरम्यान झालेल्या मैत्रिणीला लग्नाचे आमिष दाखवून बलात्कार केल्याप्रकरणी एनडीआरएफ जवानाविरुद्ध गुन्हा दाखल करण्यात आला आहे. सहा वर्षांनंतर युवतीने तक्रार दिल्यामुळे पोलीसही चक्रावले आहेत.
रूपेश लक्ष्मण लांडगे (३८) रा.पुणे असे आरोपी एनडीआरएफ जवानाचे नाव आहे. गोंदिया येथील ३२ वर्षांची युवती २०१५ मध्ये स्पर्धा परीक्षेची तयारी करीत होती. ती नागपूरवरून एसटी बसने गोंदियाला ये-जा करीत होती. याच बसमध्ये रूपेशही ये-जा करीत होता. एसटी स्टँड ते गोंदियापर्यंतच्या प्रवासात दोघांची मैत्री झाली. मैत्रीचे प्रेमात रूपांतर झाले. रूपेश शासकीय नोकरीसाठी प्रयत्न करीत होता. युवतीने दिलेल्या तक्रारीनुसार रूपेशने लग्नाचे वचन देऊन तिच्याशी शारीरिक संबंध प्रस्थापित केले. पहिल्यांदा गणेशपेठ ठाण्याच्या परिसरात तिच्याशी शारीरिक संबंध केला. त्यानंतर, रूपेशने अनेक ठिकाणी नेऊन तिच्याशी शारीरिक संबंध केला. दरम्यान, रूपेशला एनडीआरएफमध्ये शिपाई म्हणून नोकरी लागली. तो पुण्याला निघून गेला. तेथेही युवती भेटण्यासाठी गेल्यानंतर, तो तिच्याशी शारीरिक संबंध करायचा. काही दिवसांपूर्वी रूपेशने दुसऱ्या युवतीसोबत लग्न केले. याबाबत माहिती मिळताच, पीडित युवती रूपेशच्या पुणे येथील घरी गेली. तेथे रूपेशच्या पत्नीसोबत तिचा वाद झाला. रूपेशने लग्न करण्यास नकार देऊन पीडित युवतीला धमकी दिली. पीडित युवतीने गोंदिया पोलिसात तक्रार दिली. गोंदिया पोलिसांनी बलात्काराचा गुन्हा दाखल करून, हा गुन्हा गणेशपेठ पोलिसांकडे पाठविला. गणेशपेठ पोलिसांनी या प्रकरणाचा तपास सुरू केला आहे.
................