लोकमत न्यूज नेटवर्क
नागपूर - एमआयडीसीतील एका महिलेने आपल्या नवऱ्याविरुद्ध बलात्काराची तक्रार नोंदवली. तो जबरदस्तीने अनैसर्गिक शरीरसंबंध प्रस्थापित करतो, असेही तक्रारीत नमूद केले. त्यावरून पोलिसांनी गुरुवारी गुन्हा दाखल करून आरोपी नवरोबाला अटक केली.
आरोपी खासगी वाहनचालक आहे. तो एमआयडीसीत राहतो. तक्रार करणारी महिला ३९ वर्षांची असून आरोपी नवरा तिच्यापेक्षा ९ वर्षांनी लहान आहे. त्यांचे फेब्रुवारी २०२१ मध्ये लग्न झाले. महिलेचे हे दुसरे लग्न आहे. तिच्या तक्रारीनुसार, लग्नानंतर आरोपी तिच्या इच्छेविरुद्ध जबरदस्तीने शरीरसंबंध जोडतो. वारंवार अनैसर्गिक संबंध प्रस्थापित करतो. यावरून त्यांच्यात वाद निर्माण झाला असून त्यांचे वैवाहिक संबंधही तुटण्याच्या मार्गावर आहे. तो ऐकत नसल्यामुळे तक्रार देत नसल्याचे महिलेने पोलिसांना सांगितले. तिच्या तक्रारीवरून पोलीस उपनिरीक्षक विकास ठाकरे यांनी आरोपीविरुद्ध बलात्काराचा गुन्हा दाखल केला. त्याला अटक करण्यात आली असून पुढील तपास सुरू आहे.
----