प्रवीण खापरे/लोकमत न्यूज नेटवर्क
नागपूर : शहरातील प्रत्येक बाजारपेठ, मुख्य भाग अवैध पार्किंगमुळे त्रस्त आहे. एकीकडे दुकानांसमोर मोठ्या प्रमाणात वाहने पार्क केल्यामुळे दुकानदारांची डोकेदुखी वाढते. तर दुसरीकडे खरेदीसाठी बाहेर पडणाऱ्या नागपूरकरांना आपले वाहन पार्क कुठे करायचे, हा प्रश्न पडतो. शिवाय रस्त्याच्या दुतर्फा होणाऱ्या अवैध पार्किंगमुळे वाहतुकीला अडथळा निर्माण होत आहे. शहरातील मुख्य रस्त्यासह बाजारपेठेला अवैध पार्किंगने विळखा घातल्याचे चित्र आहे. वाहतूक विभाग अवैध पार्किंगवर दंड वसुलीसाठी कारवाई करतो. महापालिकाही थातूरमातूर कारवाई करते. मात्र, ठोस उपाय योजले जात नाहीत. परिणामी, पार्किंगची कोंडी सुटता सुटेनाशी झाली आहे.
रामदासपेठ ही शहरातील अतिव्यस्त असणाऱ्या भागापैकी एक अशी वस्ती. गर्भश्रीमंतांचे आलिशान निवारे, याच भागात आणि व्यावसायिक प्रतिष्ठानांची अर्थात हॉस्पिटल्स, हॉटेल्स, चहा-पान-खानावळींची ही हक्काची पेठ हाेय. रात्रंदिवस अतिव्यस्त असणाऱ्या या परिसराला आणखी गजबज करण्याचे काम वाटसरूंची वाहने करतात. ही वाहने कुठेही, कशीही पार्क केली जातात आणि त्याचा फटका रस्त्याने वाहतूक करणाऱ्या अगर पायी चालणाऱ्या नागरिकांना होतो. झाशी राणी चौकापासून ते सेंट्रल मॉल ते दीक्षाभूमी चौक ते लोकमत चौक, ही संपूर्ण रामदासपेठेची चौकट जणू पार्किंगचा अड्डाच बनली आहे. एवढेच नव्हे तर पंचशील चौकापासून सेंट्रल मॉलपर्यंतचा संपूर्ण कॅनल रोडही चारचाकींच्या पार्किंगने भरलेला असतो. याला जबाबदार कोण, हा प्रश्न आहे. याबाबत कुणाची काही तक्रार आहे का असे विचारले असता, कुणीच बोलण्यास तयार नव्हते. त्याचे कारण म्हणजे वाहन पार्क करणारे हे सगळे ग्राहक होते.
लोकमत चौक ते पंचशील चौक
लोकमत चौकापासून ते पंचशील चौकापर्यंतचा हा वर्धा महामार्ग रुंदीने साधारणत: १२० फुटाचा आहे. यातील एक ६० फुटाचा धरू या. त्यात पादचारी अर्थात फूटपाथ ४ ते ५ फुटाचे. फूटपाथ असूनही अदृश्य आहे आणि फूटपाथला लागूनच या रस्त्यावर असलेल्या प्रतिष्ठानात येणाऱ्या ग्राहकांची चारचाकी वाहने पार्क केलेली असतात. एका सर्वसाधारण कारची लांबी साधारणत: ८ ते १० फूट आणि रुंदी ३ ते ४ फूट. या चारचाकी कशाही तऱ्हेने पार्क केल्या जातात. त्यामुळे, ६० फुटाच्या रस्त्याचा एक भाग ३५ ते ४० फुटापर्यंत निमुळता झालेला असतो.
लोकमत चौक ते दीक्षाभूमी चौक
या रस्त्यावर मोठमोठ्या इमारतींमध्ये विविध हॉस्पिटल्स आहेत. एका अर्थाने शहरातील हा भाग हॉस्पिटल हब म्हणूनही ओळखला जातो. हा रस्ता साधारणत: ८० ते १०० फुटाचा आहे. रस्त्याचा एक भाग ४० ते ५० फुटाचा आणि त्यात ५ ते ६ फूट फूटपाथ आहेत. मात्र, २० फूट रस्ता जरी मोकळा मिळेल तरी धन्यता मानावी, अशी स्थिती आहे. संपूर्ण रस्ता वाटसरू अगर हॉस्पिटल्स, खानावळी, बँका आदींच्या ग्राहकांच्या वाहन पार्किंगने भरलेला असतो.