लोकमत न्यूज नेटवर्क
नागपूर : मानकापूर पोलिसांनी दोन कुख्यात गुंडांना रविवारी रात्री अटक करून त्यांच्याकडून एक पिस्तूल तसेच चार काडतुसे जप्त केली.
अभिषेक उर्फ लावा रामसिंग ईवनाते (वय २३, रा. नरसाळा) आणि कुणाल उर्फ चुस्सू विजय ठाकरे (वय २१, रा. विठ्ठलनगर, दिघोरी) अशी आरोपींची नावे आहेत. हे दोघेही सराईत गुन्हेगार आहेत. रविवारी मध्यरात्री ते नागपूरकडे येत असताना मानकापूर पोलिसांच्या नजरेस पडले. त्यांना पोलिसांनी थांबण्याचा इशारा केला असता आरोपी सुसाट वेगाने दुचाकी पळवू लागले. पोलिसांनी त्यांचा पाठलाग करून त्यांच्या मुसक्या बांधल्या. झडतीत त्यांच्याकडे पिस्तूल आणि चार काडतुसे आढळली. ते कुणाचा गेम करण्याच्या तयारीत असावे, असा पोलिसांचा संशय आहे. मानकापूरच्या ठाणेदार वैजयंती मांडवधरे यांच्या मार्गदर्शनाखाली पोलीस आरोपींची चाैकशी करीत आहेत.
-----