लोकमत न्यूज नेटवर्क
नागपूर : गिट्टीखदानमधील कुख्यात गुंड आबिद अजिमउल्ला शेख (वय २९, रा. पटेलनगर) याच्याकडून पोलिसांनी मंगळवारी दुपारी एक पिस्तूल आणि दोन जिवंत काडतुसे जप्त केली.
आबिद शेख सराईत गुन्हेगार असून त्याच्याविरुद्ध डझनभर गुन्हे दाखल आहेत. त्याच्याकडे पिस्तूल असून तो बोरगावमधील शिंगणेच्या शेताजवळ संशयास्पद अवस्थेत वावरत असल्याची माहिती गिट्टीखदान पोलिसांना मिळाली. त्यावरून ठाणेदार गजानन कल्याणकर यांच्या नेतृत्वात पोलीस उपनिरीक्षक दत्ता पेंडकर, डी. सी. पटले, हवालदार युवराज ढोले, इमरान शेख, शशांक आटे, संतोष शेंद्रे, आशिष बावणकर आदींच्या पथकाने मंगळवारी दुपारी १२.४५ च्या सुमारास तिकडे धाव घेतली. आबिद हा चिंचेच्या झाडाखाली संशयास्पद अवस्थेत दिसला. पोलिसांनी त्याला ताब्यात घेऊन विचारपूस केली असता त्याने उडवाउडवीची उत्तरे दिली. त्याची झडती घेतली असता पोलिसांना एक पिस्तूल आढळले. त्यावर मेड इन चायना असे लिहून आहे. सोबतच दोन जिवंत काडतुसे त्याच्याकडे आढळली. पोलिसांनी ती जप्त केली. प्राथमिक चाैकशीत आरोपीने हे पिस्तूल मध्यप्रदेशातून विकत घेतल्याचे सांगितले. प्रतिस्पर्धी गुंडांकडून धोका होण्याची भीती असल्याने आपण स्वत:जवळ हे पिस्तूल बाळगत असल्याचे आबिदने पोलिसांना सांगितले आहे.
---
‘गेम’ची तयारी?
आरोपी आबिद हा रेकॉर्डवरचा गुन्हेगार आहे. काही वर्षांपूर्वी प्रतिस्पर्धी गुंडांनी त्याच्यासह त्याचा साथीदार सारंग मदनेवर हल्ला चढवला होता. त्यात सारंग ठार झाला होता तर आबिद बचावला. तो या प्रकरणातील साक्षीदारही आहे. त्यामुळे त्याला सतत जीवाची भीती सतावते. या भीतीमुळेच तो कुणाचा गेम करण्याची तयारी करीत असावा, असाही संशय आहे. पीएसआय पेंडकर आणि त्यांच्या पथकातील सहकारी आबिदची कसून चौकशी करीत आहेत.
----