आता उपराजधानीतही मोबाईल डान्सबार

राज्यात डान्सबारचा विषय प्रलंबित असतानाच काही दलालांनी आता उपराजधानीत मागील काही महिन्यांपासून अवैधरीत्या मोबाईल डान्सबार सुरू केले आहेत.

पॉश फ्लॅटमध्ये रंगते मैफिल : एकाच रात्री लाखोंचे वारे-न्यारे नरेश डोंगरे नागपूर राज्यात डान्सबारचा विषय प्रलंबित असतानाच काही दलालांनी आता उपराजधानीत मागील काही महिन्यांपासून अवैधरीत्या मोबाईल डान्सबार सुरू केले आहेत. मुंबई, पुण्यासह बाहेरच्या राज्यातील बार डान्सर्स बोलावून पॉश फ्लॅटमध्ये मैफील भरवली जात आहे. याची व्हिडिओ क्लीप आंबटशौकिन, धनिकबाळामध्ये पसरविली जात आहे. त्यातून मनोरंजन करतानाच एका रात्रीत लाखोंचे वारे-न्यारे केले जात आहेत. डान्सबार परवान्याबाबत सर्वोच्च न्यायालयाने राज्य सरकारला परवानगीबाबत निर्देश दिल्यामुळे डान्सबार मालकांनी अनेक दिवसांपासून तयारी करून ठेवली आहे. कधी एकदाची सरकार परवानगी देते अन् कधी डान्सबारची छमछम तसेच नोटांची बरसात बघायला मिळते, अशी अनेक डान्सबार मालकांची अवस्था आहे. मात्र, नवनवीन अटीेंमुळे डान्सबारचा विषय प्रलंबित आहे. दुसरीकडे नोटांची बरसात करवून घेण्याची सवय जडलेल्या दलालांनी आता ‘मोबाईल डान्सबार‘ सुरू केले आहेत. पोलिसांच्या नजरेत येऊ नये म्हणून कधी या भागात तर कधी त्या भागात ते डान्सबारचे आयोजन करीत आहेत. (एकाच ठिकाणी नसल्यामुळेच त्याला मोबाईल डान्सबार म्हणतात !) काही दिवसांपूर्वी नंदनवन, वर्धमाननगरात अशी मैफल रंगली. दोन महिन्यांपूर्वीपर्यंत रिसोर्ट, फार्म हाऊस किंवा बंगल्यातही ‘तात्पुरता बार सुरू करून डान्स‘चे आयोजन केले जायचे. लोकमतने वेळोवेळी या गोरखधंद्याचा पर्दाफाश केल्यामुळे बारमालक आणि दलालांच्या पुढाकाराने चालणारे बहुतांश छुपे डान्सबार बंद झाले. त्याऐवजी आता बंगल्यात किंवा पॉश सदनिकेत आठवड्यातून एक-दोनदा डान्सबारचे आयोजन केले जाते. आयोजनाच्या चार-सहा तासांपूर्वी विशिष्ट ग्राहकांना फोन करून त्याची माहिती दिली जाते. बार डान्सर्सचे फोटोही पाठविले जाते. त्यानंतर डान्सबारचा आनंद लुटण्यासाठी आंबटशौकिन मंडळी एखाद्या विशिष्ट ठिकाणी गोळा होतात. मोठया वाहनात बसवून आयोजनाच्या ठिकाणी त्यांना नेले जाते. डान्सबारची किमान पाच हजार रुपये एन्ट्री फी असते. खाण्यापिण्याच्या व्यवस्थेसाठी वेगळी रक्कम घेतली जाते. वेश्याव्यवसायही होतो मध्यरात्री सुरू झालेली ही ‘डान्स नाईट‘ पहाटेपर्यंत सुरू असते. या वेळेत नोटांचा अक्षरश: पाऊस पडतो. अवघ्या काही तासात लाखोंचे वारे-न्यारे होतात. डान्सचे आयोजन संपल्यानंतर बार डान्सरकडून देहव्यवसायही होत असल्याची माहिती आहे. त्यासाठी डान्स बघणारी मंडळी चक्क लिलावाप्रमाणे बोली लावतात. जो जास्त रक्कम देईल त्याला ही ‘सुविधा’ उपलब्ध केली जाते. मुंबई, पुणे, चेन्नई, बेंगरुळू, हैदराबाद, पटियाला, चंदीगड, कोलकाता, लुधियाना, दिल्ली, रायपूर, इंदूर, लखनौ आणि अलीकडे नोएडासारख्या महानगरातील बहुचर्चित ‘बार डान्सर्स‘च्याही नागपूर खेपा वाढल्या आहेत.