नागपूर : केंद्रीय भूपृष्ठ वाहतूकमंत्री नितीन गडकरी यांनी गेल्या लोकसभा निवडणुकीमध्ये नामनिर्देशनपत्रासोबतच्या प्रतिज्ञापत्रात उत्पन्नाची खरी माहिती दिली नाही. त्यांनी उत्पन्न लपवून ठेवले. त्यामुळे मतदारांना सत्य माहिती कळू शकली नाही, असा दावा काँग्रेस प्रदेशाध्यक्ष नाना पटोले यांचे वकील ॲड. सतीश उके यांनी शुक्रवारी मुंबई उच्च न्यायालयाच्या नागपूर खंडपीठासमक्ष केला. (Nitin Gadkari hide true income details; Nana Patole's claim in the High Court)
पटोले यांनी गडकरी यांच्याविरुद्ध निवडणूक याचिका दाखल केली आहे. त्यावर न्यायमूर्ती अतुल चांदूरकर यांच्यासमक्ष सुनावणी झाली. दरम्यान, ॲड. उके यांनी याचिकेच्या समर्थनात विविध मुद्दे मांडले. गडकरी यांनी उत्पन्नाचा स्रोत शेती असल्याचे नमूद केले आहे; परंतु त्यांच्या नावावर कुठेही शेती नाही. त्यांनी प्रतिज्ञापत्रामध्ये केवळ चार ते पाच कोटी रुपयांची मालमत्ता दाखवली आहे. ही माहिती खरी नाही. त्यांची मालमत्ता हजारो कोटींत आहे, असेही ॲड. उके यांनी सांगितले. याशिवाय त्यांनी प्रतिज्ञापत्रातील विविध आक्षेपार्ह बाबी न्यायालयाच्या निदर्शनास आणून दिल्या. दरम्यान, न्यायालयाचा वेळ संपल्यामुळे या प्रकरणावर १४ ऑक्टोबर रोजी पुढील सुनावणी निश्चित करण्यात आली.