नागपूर : राज्य शासनाच्या निर्देशानुसार नागपुरात शनिवारी ३० ते ४४ वर्ष वयोगटातील नागरिकांच्या लसीकरणाला प्रारंभ करण्यात आला. ऑनलाईन नोंदणी आवश्यक असलेल्या या लसीकरणाला नागरिकांनी प्रतिसाद दिला. विविध स्लॉटमध्ये शहरातील १०५ केंद्रावरून सुमारे १० हजार नागरिकांनी लसीचा डोस घेतला.
३० ते ४४ वर्ष वयोगटातील नागरिकांचे लसीकरण करण्यासाठी मनपा प्रशासनाने आधीच नियोजन केलेले होते. त्यानुसार १०५ केंद्रांवर लसीकरण करण्यात आले. कोव्हिशिल्ड लसीचा पहिला डोस घेण्यासाठी या वयोगटासाठी ऑनलाईन नोंदणी बंधनकारक होती. शुक्रवारी रात्री ८.३० वाजेपासून कोव्हिन ॲपवर ऑनलाईन नोंदणीला प्रारंभ झाला. अवघ्या काही वेळातच संपूर्ण सत्रातील नोंदणी बुक झाली. काही केंद्रांवर २०० तर काही केंद्रांवर १०० डोस उपलब्ध करण्यात आले होते. नियोजनामुळे केंद्रावर अतिरिक्त गर्दी आढळून आली नाही.
१८ ते ४४ वर्ष वयोगटातील लसीकरण सुरू करण्यासंदर्भात शुक्रवारी महापौर दयाशंकर तिवारी व आयुक्त राधाकृष्णन बी. यांच्या प्रमुख उपस्थितीत बैठक पार पडली. शुक्रवारी शासनाचे निर्देश प्राप्त झाल्यानंतर नियोजनानुसार शनिवारपासून लसीकरणाला प्रारंभ झाला. राधाकृष्णन बी. आणि अतिरिक्त आयुक्त राम जोशी यांनी डिक दवाखाना लसीकरण केंद्राला भेट देऊन पाहणी केली.
...
४५ वर्षावरील नागरिकांचेही लसीकरण
सर्व १०५ केंद्रावरून ३० ते ४४ वर्ष वयोगटातील नागरिकांसोबतच ४५ वर्षांवरील नागरिकांचेही लसीकरण करण्यात येणार असल्याची माहिती मनपा प्रशासनाने दिली. शिवाय ‘ड्राईव्ह इन व्हॅक्सिनेशन’अंतर्गत सुद्धा ३० ते ४४ आणि ४५ वर्षावरील अशा दोन्ही वयोगटातील नागरिकांना लस दिली जात आहे.
...
तीन केंद्रांवर कोव्हॅक्सीन
४५ वर्षावरील नागरिकांसाठी कोव्हॅक्सिन पहिला व दुसरा डोस शासकीय वैद्यकीय महाविद्यालय (मेडिकल कॉलेज), बॅरिस्टर राजाभाऊ खोब्रागडे सभागृह, सिद्धार्थ नगर, आशीनगर झोनच्या मागे (डॉ बाबासाहेब आंबेडकर रुग्णालय) व स्व. प्रभाकर दटके म.न.पा.महाल रोग निदान केंद्र येथे उपलब्ध आहे. तसेच ज्या १८ ते ४४ वयोगटातील नागरिकांनी कोव्हॅक्सिनचा पहिला डोस घेतला आहे त्यांना दुसरा डोज शासकीय वैद्यकीय महाविद्यालय (मेडिकल कॉलेज) व स्व. प्रभाकर दटके म.न.पा.महाल रोग निदान केंद्र येथे देण्याची व्यवस्था केली आहे. यासाठी त्यांना ऑनलाईन नोंदणीचा पर्याय उपलब्ध आहे.
....