नरेश डोंगरेलोकमत न्यूज नेटवर्कनागपूर : आपल्या सिनियरवर खुनी हल्ला चढवून स्वत: आत्महत्या करणाऱ्या वकिलाने मृत्युपूर्वी येथील एका ज्येष्ठ विधिज्ञाकडे आपली कैफियत मांडली. या थरारकांडाचे कारण सांगतानाच त्याने त्याची कथित पत्नी आणि सिनियरदरम्यान नाजूक संबंध असल्याचाही आरोप केला. नाव न छापण्याच्या अटीवर संबंधित ज्येष्ठ विधिज्ञांनी लोकमतला ही खळबळजनक माहिती दिली. दरम्यान, जिच्यामुळे संशय निर्माण झाला, जिच्यामुळे एका वकिलाने दुसऱ्या वकिलावर खुनी हल्ला केला ती महिला अचानक बेपत्ता झाल्याने हे प्रकरण जास्तच रहस्यमय बनले आहे. या प्रकरणात वाढलेला गुंता ‘ती महिलाच सोडवू शकते’, हे ध्यानात आल्याने पोलिसांनी तिला शोधण्यासाठी आटोकाट प्रयत्न चालविले आहेत.जिल्हा न्यायालयाच्या इमारतीच्या समोर शुक्रवारी सायंकाळी नोकेश कुंडलिक भास्कर (वय ३४) या वकिलाने अॅड. सदानंद नारनवरे यांच्यावर कुऱ्हाडीचे अनेक घाव घालून त्यांची हत्या करण्याचा प्रयत्न केला. तत्पूर्वीच नोकेशने विष प्राशन केल्याने त्याचा मृत्यू झाला. अॅड. नारनवरे यांच्याकडे नोकेश ज्युनियर म्हणून काम करायचा. या घटनेने राज्यातील विधी वर्तुळात प्रचंड खळबळ उडाली आहे. या घटनेमागचे कारण जाणून घेण्यासाठी पोलीस, पत्रकार, वकील आणि सर्वसामान्य नागरिकही उत्सुक आहेत.लोकमतने या संबंधाने संबंधित वर्तुळाचा कानोसा घेतला असता अत्यंत धक्कादायक माहिती पुढे आली. त्यानुसार, नोकेशने अॅड. नारनवरे यांच्यावर खुनी हल्ला चढवल्यानंतर काही वकिलांनी त्याला पकडले आणि पोलिसांच्या स्वाधीन केले. जिल्हा न्यायालयाच्या आवारात पोलीस चौकी आहे. वकिलांचा रोष बघता पोलिसांनी त्याला या चौकीत नेले. तेथे एका नामवंत विधिज्ञांनी नोकेशला या थरारक घटनेमागचे कारण विचारले. यावेळी नोकेशने जे काही सांगितले ते या थरारकांडाला आणखी गडद करणारे ठरले. त्यांच्या माहितीनुसार, नोकेश गेल्या दोन ते तीन वर्षांपासून त्याच्यापेक्षा १० ते १२ वर्षे वयाने मोठी असलेल्या एका महिलेसोबत लिव्ह ईन रिलेशनशिपमध्ये राहत होता. प्रारंभी ते दोघे मनीषनगरात राहायचे. अलीकडे त्याने इंदोऱ्यातील महेशनगरात रूम केली होती. नोकेशच्या कथनानुसार, ही महिला काही दिवसांपासून नारनवरेच्या संपर्कात आली होती.ती त्यांच्यासोबत भेटीगाठी आणि फोनवरून सलग संपर्कात राहायची. नोकेशने तिला हटकताच ती त्याच्यापासून दुरावली होती. त्यामुळे नोकेश वेगवेगळ्या पद्धतीने तिच्या मागावर राहायचा. ‘सिनियर’ने तिला साडेचार लाख रुपये दिल्याचे त्याला कळले. तेव्हापासून त्याचा संशय अधिक घट्ट झाला.१५ हजारांसाठी त्रास देणारे सिनियर आपल्या पार्टनरला साडेचार लाख रुपये देतात, ती त्याच्याशी लाडीगोडीने वागते आणि आपल्याशी हेकडपणे वागते, हा प्रकारच आपल्या डोक्यातील संशय घट्ट करणारा ठरला. त्यामुळेच आपण हे थरारकांड घडविल्याचे आणि स्वत:ही आत्मघात केल्याचे त्याने ज्येष्ठ विधिज्ञांना सांगितले. दरम्यान, अत्यवस्थ अवस्थेतील अॅड. नारनवरे यांना तसेच आरोपी नोकेशला पोलिसांनी मेयोत दाखल केले. तेथे आरोपी नोकेशला डॉक्टरांनी मृत घोषित केल्याने पोलिसांची धावपळ जास्तच वाढली. या घटनेमागचे खरे कारण आरोपी किंवा नारनवरेच सांगू शकतात. मात्र, पोलिसांना बयान देण्यापूर्वीच आरोपी मृत झाला, तर नारनवरेंची स्थिती चिंताजनक आहे. त्यामुळे या घटनेमागची पार्श्वभूमी आता ‘ती’ महिलाच सांगू शकते, हे ध्यानात घेऊन पोलिसांनी तिची शोधाशोध सुरू केली. मात्र, घटना घडल्यापासून ती महिला बेपत्ता झाल्याने प्रकरण रहस्यमय बनले आहे. तिला शोधून काढण्यासाठी सीताबर्डी पोलिसांनी मनीषनगर, इंदोरा, जरीपटका आदी भागात शोधाशोध चालविली आहे.वास्तव तूर्त अंधारात!नोकेशने ज्येष्ठ विधिज्ञाकडे सांगितलेल्या माहितीनुसार, त्याच्यासोबत राहणाऱ्या महिलेने खरेच सिनियरकडून साडेचार लाख रुपये घेतले होते का, असा प्रश्न आहे. घेतले असेल तर ते कशासाठी घेतले होते आणि सिनियरने ते कशासाठी दिले होते, असेही प्रश्न आहेत.बुद्धिकौशल्याच्या बळावर वकील मंडळी वंचित आणि पीडितांना न्याय मिळवून देतात. अनेकदा दूध का दूध आणि पानी का पानी करतात. काही वेळा खोट्याचे खरे अन् खºयाचे खोटेही होते. या प्रकरणातील वास्तव तूर्त अंधारात आहे. ‘ती’ महिला पुढे आल्यानंतरच खऱ्याचे खरे अन् खोट्याचे खोटे उजेडात येऊ शकते.