वसीम कुरेशी
नागपूर : एकीकडे खासगी एअरलाईन कोरोनाच्या काळातही नवीन विमाने खरेदी करीत आहेत. तर सरकारी एअरलाईन एअर इंडियाची दोन विमाने नागपुरात कित्येक महिन्यांपासून दुरुस्तीकरिता पडलेली आहेत. या दोन विमानात अमेरिकेपर्यंत उड्डाण केलेल्या बोईंग ७७७ चा समावेश आहे. हे विमान येथे मेेन्टेनन्ससाठी आले होते. हे विमान तर दुरुस्त केलेच नाही पण या विमानाचे शेकडो पार्ट काढून दुरुस्तीस आलेल्या इतर विमानांना लावण्यात आले आहेत. एअर इंडियाच्या नागपूर एमआरओमध्ये दोन हँगर आहेत. दोन्ही हँगरमध्ये दोन बोईंग ७७७ आहे.
पहिले विमान २०१९ मध्ये आले होते. सूत्रांच्या मते, एअर इंडियाची आर्थिक बाजू कमकुवत असतानाही २१ जून २०२० पर्यंत १०० विमानांची दुरुस्तीस करण्यात आली होती. या शंभर विमानांच्या दुरुस्तीसाठी बोईंग ७७७ विमानातील साहित्याचा वापर करण्यात आला. लॉकडाऊनदरम्यान ‘वंदे भारत’ अभियानादरम्यान एमआरओवर विमानांच्या देखभाल दुरुस्तीची जबाबदारी होती. विदेशातून विमानाचे साहित्य येण्यास अडचणी येत होत्या. त्यामुळे इतर विमानांच्या दुरुस्तीसाठी एमआरओमध्ये उभ्या असलेल्या विमानातील साहित्याचा वापर करण्यात आला. त्यानंतर ६ महिन्यापूर्वी यूएसएसाठी उड्डाण करणारा ‘व्हीटीएएलटी बोईंग ७७७ सी’ दुरुस्तीसाठी आला होता. या विमानाच्या लॅँडिंग गेअरमध्ये प्रॉब्लेम होता. त्यालाही दुसऱ्या विमानाला दुरुस्त करण्यासाठी वापरण्यात आले. आता या दोन्ही विमानांचे कॉकपिट अर्धे रिकामे झाले आहेत. एअर इंडियाच्या आर्थिक परिस्थितीमुळे मुंबईच्या एमआरओमध्येही दोन्ही विमाने तशीच पडली आहेत.
- शतक केल्यानंतर एक डझनचा आकडाही पूर्ण नाही
सरकारी एअरलाईनचा असा जुगाड कधीपर्यंत सुरू राहतो याचा पत्ता नाही, पण एमआरओमध्ये पडून असलेल्या या विमानांमध्ये मोठ्या अडचणी येऊ शकतात. सूत्रांच्या मते, एमआरओमध्ये जून २०२० पर्यंत शेकडो विमाने दुरुस्त करण्यात आली आहेत. त्यानंतर एमआरओमध्ये एक डझन विमानांचीही दुरुस्ती झाली नाही. नागपूर एमआरओची स्थिती लक्षात घेता, विमाने दुरुस्तीसाठी येथे पाठविण्यात येत नाहीत. कारण कंपनीला याची जाणीव झाली आहे की या दोन विमानांच्या बहुतांश पार्टचा वापर झाला आहे, त्यामुळे नागपूर एमआरओकडून जास्त अपेक्षा ठेवणे योग्य नाही.