लोकमत न्यूज नेटवर्क
नागपूर - अल्पवयीन मुलीवर गेल्या वर्षभरापासून अत्याचार करून एका नराधमाने तिला गर्भवती बनविले. विशेष म्हणजे, पोटात दुखत असल्याची तक्रार केल्यामुळे तिला घरच्यांनी रुग्णालयात नेले अन् काही वेळेतच मुलीने एका बाळाला जन्म दिला. त्यानंतर या धक्कादायक प्रकरणाचा बोभाटा झाला. त्यामुळे त्या भागातील नागरिक संतप्त झाले आहेत.
पीडित मुलगी केवळ १५ वर्षांची आहे. ती दहावीपर्यंत शिकली असून, तिच्या घरची स्थिती अत्यंत हलाखीची आहे. तिचे आईवडील मोलमजुरी करतात. मुलीला दोन लहान बहिणी आणि एक भाऊ आहे. सोमवारी तिच्या पोटात कळा आल्याने तीने कुटुंबीयांना सांगितले. त्यानंतर आईवडिलांनी तिला मेयोत दाखल केले. डॉक्टरांनी तिची तपासणी केली. मुलीचे वय अवघे १५ वर्षे असल्याचे कुटुंबीयांनी सांगताच डॉक्टर चक्रावले. ती गर्भवती असून कोणत्याही दिवशी तिची प्रसूती होऊ शकते, असे डॉक्टरांनी कुटुंबीयांना सांगितले. त्यामुळे कुटुंबीयही हादरले. दरम्यान, तिने एका गोंडस बाळाला जन्म दिला. त्यामुळे मेयो रुग्णालयातून यशोधरानगर पोलिसांना सोमवारी सायंकाळी माहिती कळविण्यात आली. ठाणेदार संजय जाधव यांनी पीएसआय शेख यांच्यासह तत्काळ मेयो इस्पितळ गाठले. १५ वर्षीय मुलीवर मातृत्व लादणारा नराधम कोण, या संबंधाने त्यांनी मुलीच्या आईवडिलांकडे चाैकशी केली. मात्र, त्यांनी मुलीवर अत्याचार करणारा कोण, ते माहीत नसल्याचे सांगितले.
मुलीने जन्माला घातलेल्या बाळाची प्रकृती चांगली असली तरी मुलीची प्रकृती जबाब नोंदविण्याएवढी चांगली नसल्याचे सांगून डॉक्टरांनी तूर्त तिला विचारपूस करता येणार नसल्याचे पोलिसांना सांगितले. त्यामुळे आरोपी कोण, ते उघड झाले नाही.
---
आरोपीचे नाव अंधारात
कर्णोपकर्णी हे वृत्त सर्वत्र चर्चेला आल्याने उलटसुलट चर्चेला उधाण आले आहे. मुलीची प्रकृती चांगली होण्यासाठी किमान दोन दिवस लागतील असे यशोधरानगर पोलिसांना डॉक्टरांनी सांगितले. तिच्याकडूनच आरोपीचे नाव उजेडात येणार आहे. तूर्त पोलिसांनी पोस्को कायद्यानुसार, बलात्काराचा गुन्हा दाखल केला असून, पुढील तपास सुरू आहे.
----