मनपा आयुक्तांचे आदेश: अत्यावश्यक सेवा सुरू राहणार
लोकमत न्यूज नेटवर्क
नागपूर : कोरोनाचा वाढता संसर्ग पाहता शहरात कडक लॉकडाऊन लागू करण्याचा आदेश मनपा आयुक्त राधाकृष्णन बी. यांनी गुरुवारी जारी केले. आदेशानुसार नागपुरात १५ मार्च ते २१ मार्च दरम्यान कडक लॉकडाऊन लागू राहणार आहे. मात्र यातून अत्यावश्यक सेवा वगळण्यात आल्या आहेत.
या आदेशाची अंमलबजावणी व कारवाई करण्याचे अधिकार मनपाचे उपद्रव शोध व निर्मूलन पथकातील कर्मचारी, स्वच्छता निरीक्षक, मुख्य स्वच्छता अधिकारी, झोनचे सहायक आयुक्त, त्यापेक्षा वरिष्ठ दर्जाचे मनपा अधिकारी, सर्व संबंधित पोलीस उपनिरीक्षक व त्यापेक्षा वरिष्ठ दर्जाचे अधिकारी यांना प्रदान करण्यात आले आहेत.
....
हे राहणार बंद
- शहरातील शाळा, महाविद्यालये, विद्यापीठ, शिकवणी वर्ग, प्रशिक्षण संस्था
- शहर सीमेतील कोणत्याही धार्मिक व राजकीय सभा, सामाजिक व सांस्कृतिक कार्यक्रम
- शहरातील सभागृह, मंगल कार्यालये, लॉन या ठिकाणी होणारे लग्नसमारंभ.
- धार्मिक स्थळे नागरिकांना दर्शनासाठी बंद राहतील. मात्र नियमित पूजाअर्चा ५ लोकांच्या उपस्थितीत करता येईल.
- शहरातील सर्व आठवडी बाजार
- रेस्टॉरन्ट, हॉटेल, खाद्यगृह बंद राहतील. (होम डिलिव्हरी सुरू राहील)
- तरणतारण तलाव
- क्रीडा स्पर्धांचे आयोजन
- सर्व खासगी आस्थापना (आर्थिक लेखाविषयक सेवा वगळून)
- मॉल्स, चित्रपटगृह, नाट्यगृह
- दुकाने, मार्केट
- शहरातील उद्याने नागरिकांसाठी बंद
- व्यायामशाळा, जीम
- दारू दुकाने बंद, घरपोच सेवा सुरू
......
हे राहणार सुरू
- वैद्यकीय सेवा, मेडिकल स्टोअर्स
- वृत्तपत्र, मीडिया संदर्भातील सेवा
- दूधविक्री व पुरवठा
- भाजीपाला विक्री व पुरवठा
- फळविक्री व पुरवठा
- पेट्रोल पंप, गॅस एजन्सी
- सर्व प्रकारच्या प्रवासी वाहतूक सेवा(५० टक्के क्षमतेने)
- शासकीय व निमशासकीय कार्यालये (अत्यावश्यक सेवा वगळून )२५ टक्के उपस्थितीत
- मालवाहतूक सेवा
- बांधकामे, उद्योग, कारखाने
- किराणा दुकाने
- चिकन, मटन, अंडी, मास दुकाने
- पशुखाद्य दुकाने
- बँक, पोस्ट सेवा
- कोरोनाविषयक लसीकरण सेवा व चाचणी केंद्र
- ऑप्टिकल्स दुकाने
- खते, बी-बियाणे दुकाने
- निवासाकरिता असलेली हॉटेल्स, लॉज(५० टक्के क्षमतेने)
......................