उमरेड : उमरेडपासून केवळ दोन किमी अंतरावर असलेल्या आमनदीच्या काठावर (कुही मार्गावर) असलेल्या एका शेतात बिबट्याने हल्ला चढवून कालवडीची शिकार केली. ही घटना शनिवारी सकाळच्या सुमारास उघडकीस आली.
उमरेडच्या बुधवारी पेठ येथील रहिवासी प्रभाकर रामभाऊ बेले यांच्या मालकीची ही कालवड असून, शहरालगतच बिबट्याचा वावर दिसून आल्यामुळे परिसरात भीतीचे वातावरण निर्माण झाले आहे. प्रभाकर बेले यांची कुही मार्गावरील आमनदीच्या काठालगत शेती आहे. नेहमीप्रमाणे त्यांनी आपली जनावरे शेतातच बांधून ठेवली हाेती. दरम्यान शनिवारी सकाळच्या सुमारास बेले हे शेतात गेले असता, कालवड मृतावस्थेत आढळून आली. वनविभागास तातडीने माहिती दिल्यानंतर पंचनामा करण्यात आला. नुकसानभरपाई देण्याची मागणी करण्यात आली असून, योग्य उपाययोजना करण्याची मागणी शेतकऱ्यांनी वनविभागाकडे केली आहे.