लोकमत न्यूज नेटवर्क
नागपूर - ध चा मा झाला अन् एका कुख्यात गुन्हेगाराने आपल्या साथीदारांच्या मदतीने एका तरुणावर प्राणघातक हल्ला चढवला. या हल्ल्यात कुणाल कैलास रुढे (वय २७) हा गंभीर जखमी झाला. नवीन खापरी पुनर्वसन वसाहतीत गुरुवारी रात्री ८.३० च्या सुमारास ही घटना घडली.
कुणाल रुढे राजारामनगरात राहतो. त्याच्या मैत्रिणीने जॉबची विचारणा केली होती. कुणालने अभ्यंकरनगरात एका ओळखीच्या ठिकाणी बोलतो. त्यासाठी पॅन किंवा आधार कार्ड आणि शैक्षणिक प्रमाणपत्र द्यावे लागेल, असे म्हटले. मानलेल्या बहिणीने तिच्या मैत्रिणीला हे सांगितले. एकदा कुणालसोबत (जॉबच्या ठिकाणी) जाऊन ये, असाही सल्ला दिला. कुणालसोबत जाऊन ये’ या वाक्याचा मैत्रिणीने चुकीचा अर्थ काढला. ते आरोपींना सांगितले. त्यावरून संतप्त झालेल्या आरोपी कुणाल भीमराव वाघमारे, आकाश मेघराज गडलिंग (दोघेही रा. खापरी पुनर्वसन) आणि रिशभ राजेश रामटेके (रा. विराज पार्क, सुदर्शन ले-आऊट) या तिघांनी कुणालवर हल्ला चढवला. आरोपींनी चाकू, काचेचा तुकडा आणि दगडाने गंभीर हल्ला केल्याने कुणाल गंभीर जखमी झाला. आरडाओरड ऐकून बाजूची मंडळी धावली. त्यानंतर आरोपी पळून गेले. जखमी कुणालला रुग्णालयात दाखल करून पोलिसांना कळविण्यात आले. मिळालेल्या माहितीवरून बेलतरोडीचे एपीआय घोडके यांनी हत्येचा प्रयत्न केल्याच्या आरोपावरून गुन्हा दाखल केला. लगेच तिन्ही आरोपींच्या मुसक्या बांधण्यात आल्या. त्यांना आज न्यायालयात हजर करून त्यांचा पाच दिवसाचा पीसीआर मिळवला. पुढील तपास पीएसआय जायभाये करीत आहेत. पोलिसांच्या माहितीनुसार, आरोपी कुणाल वाघमारे सराईत गुन्हेगार आहे. त्याच्याविरुद्ध अनेक गुन्हे दाखल आहेत.
----
नंदनवनमध्ये पानटपरीचालकाला भोसकले
गुरुवारी रात्री नंदनवन पोलीस ठाण्याच्या हद्दीत वाठोडा वस्तीत जुन्या वादातून एकाने पानटपरी चालविणाऱ्या तरुणाला भोसकले. सूरज मुन्नालाल मिश्रा (वय २७, रा. अबूमियानगर पारडी) असे जखमीचे नाव आहे. सूरज त्याचा मित्र सुगत बागडे तसेच आरोपी मामा ऊर्फ संदीप देवगीर गिरी (वय२७, रा. खैरीपुरा लालगंज) हे तिघे गुरुवारी रात्री ९ च्या सुमारास वाठोेड्यातून दुचाकीने जात होते. अचानक त्यांच्यात वाद झाला अन् आरोपी मामा गिरीने सूरजला चाकूचे वार करून गंभीर जखमी केले. संतोष लालजी शुक्ला (वय ३६, रा. सिद्धेश्वरी नगर) यांनी दिलेल्या तक्रारीवरून नंदनवन पोलिसांनी आरोपी मामा गिरीविरुद्ध गुन्हा दाखल केला. पुढील तपास सुरू आहे.
---