कोविड नियंत्रणासाठी मनपा सतर्क : रविवारी ३५० लोकांची तपासणी
लोकमत न्यूज नेटवर्क
नागपूर : शहरात कोरोनाबाधितांची वाढती संख्या वाढत असल्याने मनपाचा आरोग्य विभाग सतर्क झाला आहे. मनपा आयुक्तांनी घोषणा केलेल्या नवीन ९ हॉटस्पॉट भागातील नागरिकांची घरोघरी जाऊन तपासणी केली जात आहे. रविवारी ३५० नागरिकांची तपासणी करण्यात आली. या भागातील पाच हजार नागरिकांची तपासणी केली जाणार आहे. संशयितांची कोरोना चाचणी करून अहवाल पॉझिटिव्ह आल्यास त्यांना विलगीकरणात पाठविले जात आहे.
संक्रमितांच्या संपर्कात आलेल्या लोकांचे स्क्रीनिंग सुरू केली आहे. पहिल्या दिवशी २५० लोकांची, तर दुसऱ्या दिवशी रविवारी ३५० नागरिकांची तपासणी करण्यात आली. ३५ संशयितांची कोरोना चाचणी करण्यात आली. याचा रिपोर्ट सोमवारी मिळणार असल्याची माहिती महापालिकेचे आरोग्य अधिकारी डॉ. संजय चिलकर यांनी दिली.
विशेष म्हणजे महापालिका आयुक्तांनी खामला, स्वावलंबीनगर, जयताळा, अयोध्यानगर, न्यू बिडीपेठ, वाठोडा, दिघोरी, जरीपटका, जाफरनगरात अधिक संक्रमित आढळल्यामुळे या भागांना हॉटस्पॉटच्या श्रेणीत टाकले आहे. या भागात ट्रेसिंग व कोविड तपासणीची प्रक्रिया या भागात वाढविण्यात आली आहे. संक्रमितांचे घर व आजूबाजूच्या शेजाऱ्यांची माहिती संकलित केली जात आहे. संक्रमण टाळण्यासाठी उपाययोजना केल्या जात आहेत.
....
झोन स्तरावर ७२ पथक गठित
हॉटस्पॉट भागातील नागरिकांची तपासणी करण्यासाठी ७२ पथक गठित करण्यात आले आहेत. यात १४४ कर्मचाऱ्यांचा समावेश आहे. एका पथकाकडून दररोज ५० घरांतील सदस्यांची आरोग्य विभागाच्या पथकामार्फत संशयितांची तपासणी व स्क्रिनिंग केली जात आहे. तपासणीत लक्षणे आढळून आल्यास आरटीपीसीआर टेस्ट केली जात आहे.
...
पथकांची संख्या वाढविणार
सध्या ७२ पथकामार्फत तपासणी व स्क्रिनिंग केली जात आहे. या कामाला गती देण्यासाठी सोमवारपासून पथकांची संख्या वाढविली जाणार आहे. यात मनपातील अन्य विभागातील कर्मचाऱ्यांचा समावेश राहील. हे कर्मचारी आरोग्य विभागातील कर्मचाऱ्यांना कामासाठी मदत करतील.