लोकमत न्यूज नेटवर्क
नागपूर : शहरातील वेगवेगळ्या भागांत किरकोळ कारणावरून हल्ला चढवून मारहाण केल्याच्या पाच घटना घडल्या. एमआयडीसी, सदर, सोनेगाव आणि कपिलनगर पोलीस ठाण्याच्या हद्दीत घडलेल्या या घटनांची संबंधित पोलिसांनी नोंद घेत गुन्हे दाखल केले आहेत.
एमआयडीसीच्या रॉय टाऊनमध्ये फिर्यादी अमन धानधराटे (वय ३३) राहतात. ते सॉफ्टवेअर डिझायनर आहेत. याच भागात ऑटोचालक आरोपी स्वप्निल वालदे राहतो. तो गुन्हेगारी वृत्तीचा आहे. २७ ऑगस्टला रात्री ८.३० वाजता त्याने सोसायटीच्या थेट रस्त्यामध्ये आपला ऑटो उभा केला. त्यावरून अमनने त्याला जाब विचारला असता आरोपी स्वप्निल त्याची पत्नी, प्रफुल्ल, विपुल आणि त्यांचे साथीदार अमनच्या घरावर चालून आले. त्यांनी अमनला मारहाण करून महिलेचा विनयभंग केला. तसेच अमनचा लॅपटॉप फेकून जीवे मारण्याची धमकी दिली.
एमआयडीसीतच दुसरी घटना २९ ऑगस्टच्या रात्री १०.३० वाजता घडली. गोविंद यादव (वय ५८) यांना आणि त्यांच्या पत्नीला आरोपी जितेंद्र यादव, कलावती यादव, अमित आणि संदीप यादव यांनी बेदम मारहाण केली. गोविंद यांचा मुलगा बचावासाठी आला असता त्याला आरोपींनी कडाडून चावा घेतला.
---
सदर
घरमालकासोबत वाद झाल्यानंतर आरोपी जय कनोजिया, वीरू कनोजिया आणि साथीदारांनी अनुज राजेंद्रकुमार सिडाम (वय२९, रा. बैरामजी टाऊन) यांच्यावर लाकडी दांड्याने हल्ला करून त्यांना जबर दुखापत केली. सोमवारी सकाळी ११.३० च्या सुमारास ही घटना घडली.
---
सोनेगाव
सोनेगाव पोलीस ठाण्याच्या हद्दीत राहणारे हर्षल सुधाकर हिवाळे (वय २७) यांना आरोपी सागर वामन गजभिये आणि त्याच्या आईने सोमवारी रात्री ८.२० वाजता वाद घातला. बाचाबाचीनंतर सागरने हर्षलवर हॉकी स्टीकने हल्ला करून त्यांना जबर दुखापत केली.
---
कपिलनगर
अशाच प्रकारे सोमवारी रात्री ७.३० च्या सुमारास उप्पलवाडीतील एका कारखान्यात काम करणारे धर्मवीर रामवीर यादव (वय २०) याच्यावर दुर्गेश जाधव, दिनेश यादव, नईम प्रजापती, अन्सार आणि त्याच्या साथीदारांनी हल्ला चढवून बेदम मारहाण केली. आरोपींनी धर्मवीरच्या स्विफ्ट कारचीही तोडफोड केली.