नागपूर : महाराष्ट्र एक्स्प्रेसमध्ये गुटखा विकणाऱ्या एका अवैध व्हेंडरवर गुन्हा दाखल करायचे सोडून त्यास बेदम मारहाण केल्याची घटना नागपूर रेल्वेस्थानकावर घडली. ‘मला मारू नका, गुन्हा दाखल करा’अशी विनवणी करीत असतानाही आरपीएफने त्यास मारहाण करून गुन्हा दाखल न करताच सोडून दिल्यामुळे आश्चर्य व्यक्त करण्यात येत आहे. सिद्धार्थ बाबाराव इंगळे (३६) रा. सोनेगाव, ता. कारंजा जि. वर्धा असे या अवैध व्हेंडरचे नाव आहे.
लोहमार्ग पोलीस ठाण्यासमोर रडत रडत सिद्धार्थने सांगितले की, तो महाराष्ट्र एक्स्प्रेसमध्ये गुटखा आणि पेपर सोप विकत होता. यापूर्वी तो रेल्वेगाड्यात चहा विकत होता. शनिवारी दुपारी १.३० वाजता वर्धा रेल्वेस्थानकावरून तो महाराष्ट्र एक्स्प्रेसमध्ये चढला. नागपूर रेल्वेस्थानकावर उतरल्यानंतर त्यास रेल्वे सुरक्षा दलाच्या जवानांनी पकडले. काही विचारण्याच्या आतच त्यांनी या अवैध व्हेंडरला बेदम मारहाण सुरू केली. त्यानंतर त्याला आरपीएफ ठाण्यात आणून पुन्हा पट्ट्याने मारहाण केल्याची माहिती या व्हेंडरने दिली. त्याचे शर्टही आरपीएफ जवानांनी फाडले. मला मारू नका, गुन्हा दाखल करा, अशी विनवणीही आपण केली. परंतु कुणीच ऐकायला तयार नसल्याचे त्याने सांगितले. डाव्या हाताला जबर मारहाण झाल्यामुळे हात उचलत नसून तो फ्रॅक्चर झाला असावा, असा अंदाजही त्याने व्यक्त केला. अवैध व्हेंडरला पकडल्यानंतर आरपीएफच्या वतीने रेल्वे अॅक्ट १४४ नुसार गुन्हा दाखल करण्यात येतो. त्यानंतर त्यांना न्यायालयासमोर हजर करण्यात येते. परंतु या अवैध व्हेंडरला आरपीएफने बेदम मारहाण केल्यामुळे आश्चर्य व्यक्त करण्यात येत आहे. याबाबत आरपीएफचे निरीक्षक आर. एल. मीना यांना विचारणा केली असता, अशा कोणत्याच व्हेंडरला ठाण्यात आणले नाही आणि मारहाण केली नसल्याचे त्यांनी सांगितले. असे असेल तर सिद्धार्थ काहीच कारण नसताना आरपीएफवर आरोप का करीत होता, हा प्रश्न आहे. जर त्यास पोलिसांची भीती वाटत असती तर तो लोहमार्ग पोलीस ठाण्यात गेला नसता. तो अवैध व्हेंडर होता तर त्याला मारहाण न करता त्याच्यावर गुन्हा दाखल केला जाऊ शकत होता. तो खोटे बोलत होता तर त्यास रेल्वेस्थानक परिसरात कसे थांबू देण्यात आले, हा प्रश्नही उपस्थित करण्यात येत आहे. लोहमार्ग पोलीस ठाण्यासमोरच एका आरपीएफ जवानासमोर सिद्धार्थ आरपीएफने केलेल्या मारहाणीबाबत ओरडत होता.
.................