लोकमत न्यूज नेटवर्क
नागपूर : कोरोना संक्रमण झपाट्याने वाढत आहे. कॉन्टॅक्ट ट्रेसिंगची सर्वात मोठी समस्या असल्याने महापालिका प्रशासनाची चिंता वाढली आहे. होम आयसोलेशनमधील रुग्णांचा मुक्त संचार असल्याने संक्रमणाचा धोका वाढला आहे. याला आळा घालण्यासाठी केंद्र सरकारच्या दिशानिर्देशानुसार सर्वाधिक पॉझिटिव्ह रुग्ण असलेल्या हॉटस्पॉट भागाला कंटेनमेन्ट झोन घोषित करून हा परिसर सील केला जाणार आहे.
कोरोना संक्रमणाची साखळी खंडित करण्यासाठी कोरोना चाचणी, कॉन्टॅक्ट ट्रेसिंग, विलगीकरण व उपचार होणे आवश्यक आहे. सध्या कॉन्टॅक्ट ट्रेसिंगची मोठी समस्या आहे. बाधिताच्या संपर्कात आलेले अनेक जण कोरोना चाचणी करीत नाही. अशा लक्षणे नसलेल्या पॉझिटिव्ह रुग्णांची संख्या मोठी आहे. असे रुग्ण सर्वत्र वावरत असल्याने संक्रमण वाढत आहे.
महापालिकेच्या लक्ष्मीनगर, हनुमान नगर व मंगळवारी झोनमध्ये सर्वाधिक पॉझिटिव्ह रुग्ण आहेत. या भागातील हॉटस्पॉट निश्चित करून कंटेनमेन्ट झोन जाहीर करून परिसर सील केला जाणार असल्याची माहिती मनपाचे अतिरिक्त आयुक्त जलज शर्मा यांनी दिली. सध्या नागपूर शहरात २७ हजार ८६६ अॅक्टिव्ह रुग्ण आहेत. यातील २३ हजार ८०० होम आयसोलेशनमध्ये तर ३७४१ रुग्णांलयात उपचार घेत आहेत.
...
एका आठवड्यात मृत्यू दुप्पट
१५ ते २१ मार्च २०२० या कालावधीत नागपूर शहरात २२ हजार ५७८ रुग्ण पॉझिटिव्ह आढळून आले, तर या कालावधीत १६५ रुग्णांचा मृत्यू झाला. मात्र २१ ते २८ मार्च दरम्यान २५ हजार ७४० पॉझिटिव्ह आढळून आले. तर ३०७ रुग्णांचा मृत्यू झाला. आठवडाभरात मृत्यूचा आकडा दुप्पट झाला आहे. ही चिंतेची बाब आहे.
...
आधीच्या लाटेच्या तुलनेत परिस्थिती गंभीर
मागील वर्षी सप्टेंबर महिन्यात कोरोनाचे रुग्ण मोठ्या प्रमाणात वाढले होते. १३ सप्टेंबरला बाधितांचा आकडा २३४३ पर्यंत पोहोचला होता. परंतु दुसऱ्या लाटेत हा आकडा कधीच पार केला आहे. १ मार्चपासून बाधितांचा आकडा दररोज वाढत असून तो ३५०० ते ४००० वर गेला आहे. आधीच्या लाटेच्या तुलनेत कोरोनाची दुसरी लाट अधिक तीव्र असून चिंता वाढविणारी आहे.
....
१ मार्च ते २८ मार्च दरम्यान झालेली रुग्णवाढ
आठवडा चाचण्या पॉझिटिव्ह मृत्यू
१ ते ७ मार्च ६३८७५ ७१९४ ५५
८ ते १४ मार्च ६८५७२ १२७७३ ६९
१५ ते २१ मार्च १,०२८०४ २२५७८ १६५
२१ ते २८ मार्च १,११,११३ २५७४० ३०७