नागपूर : भरधाव ट्रकने धडक दिल्यामुळे दुचाकीवरील आत्या ठार झाली. तर भाचा गंभीर जखमी झाला. ही घटना वाडी पोलिस ठाण्याच्या हद्दीत शुक्रवारी १२ एप्रिलला रात्री ११ वाजताच्या सुमारास घडली.
कुसुम पारागु कटोते (५३, रा. बक्षी ले आऊट, अमरावती रोड) असे या अपघातात ठार झालेल्या महिलेचे नाव आहे. तर साहिल सुरेश शंभरकर (२६, रा. रघुपतीनगर वाडी) असे गंभीर जखमी झालेल्या भाच्याचे नाव आहे. साहिल आपली आत्या कुसुम यांना अ‍ॅक्टीव्हावर बसवून त्यांच्या घरी सोडून देण्यासाठी निघाला. दरम्यान अमरावती रोडवर वडधामना चौक येथे अज्ञात ट्रक चालकाने त्याच्या ताब्यातील ट्रक भरधाव वेगाने व निष्काळजीपणे चालवून त्यांच्या अ‍ॅक्टीव्हाला जोरात धडक दिली.
या दोघेही गंभीर जखमी झाले. अपघातानंतर ट्रक चालक घटनास्थळावरून पळून गेला. गंभीर जखमी झालेल्या दोघांनाही उपचारासाठी खाजगी रुग्णालयात दाखल केले असता डॉक्टरांनी कुसुम यांना तपासून मृत घोषित केले. तर गंभीर जखमी असलेल्या साहिलवर उपचार सुरु आहेत. या प्रकरणी फिर्यादी सुजाता केतन सुखदेवे (४७, रा. बक्षी ले आऊट, अमरावती रोड) यांनी दिलेल्या तक्रारीवरून वाडी पोलिस ठाण्याचे उपनिरीक्षक अविनाश निकाळजे यांनी आरोपी ट्रक चालकाविरुद्ध कलम २७९, ३३८, ३०४ (अ), सहकलम १३४, १७७ नुसार गुन्हा दाखल करून तपास सुरु केला आहे.