उमरेड : तालुक्यातील कळमना शिवारातील पेंढराबोडी तलावात आढळून आलेल्या तरुणाचा खून झाल्याची बाब उघडकीस आली आहे. उमरेड पोलिसांच्या तपासानंतर हा प्रकार घातपाताचा असल्याचे निष्णन्न झाले असून आरोपी संजय भानारकर (रा. जोगीठाण पेठ, उमरेड) याचा शोध घेतला जात आहे. आरोपी फरार झाल्याची माहिती पोलीस निरीक्षक यशवंत सोलसे यांनी दिली.
पेंढराबोडी तलावात २१ नोव्हेंबर २०२० ला ३० ते ३५ वर्षे वयोगटातील तरुणाचे प्रेत तरंगताना आढळून आले होते. याप्रकरणी मंसाराम तुळशीराम मेश्राम यांच्या तक्रारीवरून गुन्हा दाखल करीत उमरेड पोलिसांनी तपास सुरू केला. त्यानंतर मृताची ओळख पटली. मृत शुभम रमेश खंडार (२८, रा. बहिणाबाईनगर, उमरेड) असल्याचे चौकशीत निष्पन्न झाले. चौकशीदरम्यान मृताचा मोठा भाऊ लोकेश खंडार याने आरोपी संजय भानारकर याच्यावर संशय व्यक्त केला. मृत शुभम खंडार याच्याकडे आरोपी संजयचे वारंवार जाणे-येणे असायचे. नेहमीच दोघांमध्ये खटके उडत होते. वारंवार दोघांमध्ये भांडण होत असे, यातूनच घातपात करून खून केल्याची तक्रार लोकेश खंडार याने पोलीस ठाण्यात केली. पोलीस तपासाअंती सदर प्रकरणी आरोपी संजय भानारकर याच्या विरुद्ध ३०२ कलमांन्वये गुन्हा दाखल करण्यात आला. आरोपीचा शोध घेतला जात आहे.