नागपूर : तीन वर्षांपूर्वी भूखंड विकण्याचा सौदा करून १९ लाख रुपये घेणाऱ्या महिलेने अलीकडे हा भूखंड दुसऱ्याला विकून टाकला.
स्वाती सुधीरचंद्र चटर्जी असे आरोपी महिलेचे नाव आहे. फिर्यादी राजेश रामकिशन यादव हे चंदन नगरात राहतात. सक्करदरा पोलीस ठाण्यात त्यांनी गुरुवारी नोंदविलेल्या तक्रारीनुसार, आरोपी स्वाती चॅटर्जी यांनी २३ मार्च २०१८ ला यादव यांच्यासोबत धंतोलीतील राहते घर आणि भूखंड विकण्याचा सौदा केला होता. त्यापोटी चॅटर्जी यांनी यादव यांच्याकडून १९ लाख रुपये घेतले होते. या संबंधाने सक्करदरा येथील दुय्यम निबंधक कार्यालयात रीतसर खरेदी-विक्रीचा व्यवहारही झाला होता. यानंतर चटर्जी यांनी हा भूखंड दुसऱ्याला विकून यादव यांची फसवणूक केली. हा प्रकार लक्षात आल्यानंतर काही दिवसांपूर्वी यादव यांनी सक्करदरा पोलीस ठाण्यात तक्रार नोंदविली. पोलिसांनी चौकशी केल्यानंतर गुरुवारी या प्रकरणात चॅटर्जी यांच्याविरुद्ध फसवणुकीचा गुन्हा नोंदविला.
---
वडिलांना वाचविण्याच्या प्रयत्नात मुलाचा मृत्यू
नागपूर : वृद्ध वडिलांना वाचविण्याच्या प्रयत्नात गंभीररीत्या भाजलेल्या मुलाचा उपचारांदरम्यान मृत्यू झाला. प्रवीण दशरथ गाटकीने (वय ४९) असे मृताचे नाव आहे.
प्रवीण त्यांच्या परिवारासह महालमधील शिवाजीनगर येथे राहत होते. ६ मे च्या रात्री ९.३० ते १० च्या दरम्यान प्रवीण यांचे वृद्ध वडील दशरत गाटकीने (वय ७५) यांनी स्वतःच्या अंगावर पेट्रोल टाकून जाळून घेतले. वडिलांना वाचविण्यासाठी प्रवीण धावले. त्यांना विझविण्याचा प्रयत्नांत प्रवीण गंभीररीत्या भाजले गेले. दोघांनाही रुग्णालयामध्ये दाखल करण्यात आले. तेथे गुरुवारी मध्यरात्रीनंतर प्रवीण यांचा मृत्यू झाला. या घटनेमुळे कोतवाली परिसरात हळहळ व्यक्त केली जात आहे.
--
दोघांनी लावला गळफास
नागपूर : शहरातील वेगवेगळ्या भागात दोघांनी गळफास लावून आत्महत्या केली.
गिट्टीखदानमधील सुरेंद्रगड परिसरात राहणारे यशवंत येटे (वय ६७) यांनी गळफास लावून आत्महत्या केली. शुक्रवारी सकाळी अकराच्या सुमारास ही घटना उघडकीस आली. मिळालेल्या माहितीवरून गिट्टीखदान पोलिसांनी आकस्मिक मृत्यूची नोंद केली. पुढील तपास सुरू आहे.
दुसरी घटना यशोधरा नगरातील आहे. नागसेनवन नगरात राहणारे पांडुरंग गंगाराम लांडे (वय ७५) यांनी गळफास लावून आत्महत्या केली. शुक्रवारी पहाटे चारच्या सुमारास ही घटना घडली. मिळालेल्या माहितीवरून यशोधरा नगर पोलिसांनी आकस्मिक मृत्यूची नोंद केली. पुढील तपास सुरू आहे.
---
आकस्मिक मृत्यू
नागपूर-वर्धा मार्गावरील न्यू स्नेह नगरात राहणारे सचिन प्रभाकर हिवरे (वय ३३) यांची प्रकृती बिघडल्याने त्यांचा आकस्मिक मृत्यू झाला.