जनादेश : प्रफुल्ल पटेल, मोघेंचा समावेश नागपूर : १६ व्या लोकसभा निवडणुकीत विदर्भात अनेक दिग्गजाचा दारुण पराभव झाला. यात केंद्रीय मंत्री प्रफुल्ल पटेल, माजी केंद्रीय मंत्री मुकुल वासनिक व विलास मुत्तेमवार, राज्याचे सामाजिक न्याय मंत्री शिवाजीराव मोघे आणि सांस्कृतिक कार्य मंत्री संजय देवतळे या नेत्यांचा समावेश आहे. वर्धा लोकसभा मतदारसंघातून दत्ता मेघे यांचे पुत्र सागर मेघे यांना काँग्रेस आघाडीची उमेदवारी देण्यात आली होती. युतीचे रामदास तडस यांनी ५ लाख ३७ हजार ५१८ मते घेऊन सागर मेघे यांचा २ लाख १५ हजार ८७३ मतांनी पराभव केला आहे. मेघे यांना ३ लाख २१ हजार ७३५ मते मिळाली आहेत. अमरावती लोकसभा मतदारसंघात शिवसेनेचे खा. आनंदराव अडसूळ यांनी ४ लाख ६७ हजार २१२ मते प्राप्त केली. त्यांनी राष्ट्रवादीच्या नवनीत राणा यांचा १ लाख ३७ हजार ९३२ मतांनी पराभव केला. राणा यांना ३ लाख २९ हजार २८0 मते मिळाली. चंद्रपूरमध्ये खा. हंसराज अहीर यांनी ५ लाख ८ हजार ४९ मते घेऊन बाजी मारली आहे. त्यांनी राज्याचे सांस्कृतिक कार्य मंत्री संजय देवतळे यांचा २ लाख ३६ हजार २६९ मतांनी पराभव केला आहे. देवतळे यांना २ लाख ७१ हजार ७८0 मते पडली आहेत. अकोल्यात पुन्हा एकदा भाजपचे संजय धोत्रे विजयी झाले आहेत. त्यांनी ४ लाख ५६ हजार ४७२ मते घेत काँग्रेसचे हिदायत पटेल यांचा २ लाख १ हजार ११६ मतांनी पराभव केला. भारिप-बमसंचे अध्यक्ष अँड. प्रकाश आंबेडकर यांना २ लाख ३८ हजार ७७६ मते मिळाली आहेत. अकोल्याप्रमाणे शिवसेना यवतमाळ-वाशिम आणि बुलडाणा मतदारसंघही कायम राखण्यात यशस्वी ठरली आहे. यवतमाळ-वाशिम मतदारसंघातून भावना गवळी यांनी राज्याचे सामाजिक न्याय मंत्री शिवाजीराव मोघे यांचा ९३ हजार ८१६ मतांनी पराभव केला आहे. गवळी यांना ४ लाख ७७ हजार ९0५ मते आणि मोघे यांना ३ लाख ८४ हजार ८९ मते मिळाली आहेत. बुलडाणा मतदारसंघात प्रतापराव जाधव यांनी ५ लाख ९ हजार १४५ मते घेऊन राष्ट्रवादीचे आ. कृष्णराव इंगळे यांचा १ लाख ५९ हजार ५७९ मतांनी पराभव केला. इंगळे यांना ३ लाख ४९ हजार ५६६ मते मिळाली आहेत. चिमूर-गडचिरोली मतदारसंघात भाजपचे अशोक नेते यांनी ५ लाख ३५ हजार ९८२ मते घेऊन काँग्रेस आघाडीचे डॉ. नामदेव उसेंडी यांचा पराभव केला. उसेंडी यांना २ लाख ९९ हजार १२ मते मिळाली आहेत. नेते २ लाख ३६ हजार ९७0 मताधिक्याने विजयी झाले आहेत.
दिग्गजांचा दारुण पराभव
By admin | Updated: May 17, 2014 01:04 IST