नागपूर : स्व. बाळासाहेब ठाकरे गोरेवाडा आंतरराष्ट्रीय प्राणिसंग्रहालय उद्यान आणि महाराजबाग प्राणिसंग्रहालयातील प्राण्यांची अदलाबदली करण्याची प्रक्रिया सुरू झाली आहे. केंद्रीय प्राणिसंग्रहालय प्राधिकरणाच्या मंजुरीनंतर ही प्रक्रिया सुरू केली जाणार आहे.
प्राप्त माहितीनुसार, गोरेवाडा व्यवस्थापनाने महाराजबाग प्राणिसंग्रहालयातून १० हरिण, ४ काळवीट आणि ४ निलगायींची मागणी केली आहे. तर महाराजबाग व्यवस्थापनाने या बदल्यात गोरेवाडातील एक वाघीण मागितली आहे. याकरिता महाराजबाग व्यवस्थापनाने केंद्रीय प्राणिसंग्रहालय प्राधिकरणाकडे परवानगी मागितली आहे. ती मिळताच येथील प्राण्यांची अदलाबदली करता येईल.
महाराजबागेत सध्या ‘जान’ नावाची वाघीण आणि ब्रह्मपुरी येथून आणलेला ‘महाराजा’ हा वाघ आहे. मागील अनेक वर्षांपासून महाराजबाग व्यवस्थापन एक नर वाघ मिळावा यासाठी सातत्याने प्रयत्नरत होते. काही वर्षांपूर्वी ‘जान’ वाघिणीची बहीण ‘ली’ हिला गोरेवाडामध्ये प्रजनन कार्यासाठी दिले होते. तर दुसरी बहीण ‘चेरी’ हिला छत्तीसगडमधील काननपेंढरी प्राणिसंग्रहालयात पाठविण्यात आले आहे. तेव्हापासून ‘जान’ महाराजबागेत एकटीच आहे. तिच्यासाठी जोडीदार मिळविण्यासाठी येथील व्यवस्थापनाची धडपड सुरू होती. अखेर गोरेवाडा रेस्क्यू सेंटरने ऑगस्ट २०२० मध्ये ब्रम्हपुरीहून पकडून आणलेला ‘महाराजा’ वाघ ब्रीडिंगसाठी दिला. मात्र ‘जान’ आता ११ वर्षांची झाली आहे. अभ्यासकांच्या मते कोणताही वाघ १४ ते १५ वर्षे जगतो. अशा परिस्थितीत आता ५ वर्षांच्या ‘महाराजा’ला एखाद्या वाघिणीची सोबत हवी आहे.
...
बिबट्याच्या हल्ल्यात काळविटाचा झाला होता मृत्यू
प्राप्त माहितीनुसार, काही वर्षांपूर्वी गोरेवाडा प्रकल्पामध्येही काळविटाची जोडी होती; परंतु बिबट्याच्या हल्लात एका हरणाचा मृत्यू झाला होता. त्यामुळे गोरेवाडा व्यवस्थापनाने आता पुन्हा काळविटाची मागणी केली आहे.
...