- अरुणा पुरोहित : महिला दिनी होणार अभियानास सुरुवात
लोकमत न्यूज नेटवर्क
नागपूर : महिला दिन आला की वेगवेगळ्या संस्थांकडून वेगवेगळ्या क्षेत्रातील महिलांच्या सत्कार सोहळ्याचे आयोजन केले जाते. भाषणे ठोकली जातात, महिलांच्या स्वातंत्र्याच्या, युगानुयुगे पिळवणूक झाल्याच्या, प्रगतीच्या बाता मारल्या जातात आणि दिवस लोटला की त्या बाताही विरून जातात. या सगळ्यात महिलांसाठी महत्त्वाच्या असलेल्या प्राथमिक गरजेकडे अर्थात नैसर्गिक विधी टॉयलेट, शौचालयाकडे कुणाचेच लक्ष गेले नाही, ही शोकांतिका आहे. तोच धागा पकडत महिला दिनाच्या पार्श्वभूमीवर महिलांसाठी ‘चांगुलपणाची चळवळ’ देशपातळीवर राबविली जाणार असून, याची सुरुवात नागपुरातून केली जाणार असल्याची माहिती चळवळीच्या संयोजिका अरुणा पुरोहित यांनी पत्रपरिषदेत दिली.
महिलांना वर्तमानात सर्वात मोठी भेडसावणारी समस्या म्हणजे मलमूत्रविसर्जनाची आहे. सामाजिक परिवर्तनासोबत महिला आता घराबाहेर पडायला लागल्या आहेत. व्यवसाय, नोकरी, सामाजिक उपक्रम, राजकारण या सर्वच क्षेत्रात महिला नेतृत्व करायला लागल्या आहेत. मात्र, प्रवासात त्यांच्यासाठी टॉयलेट, शौचालयाची पुरेशी व्यवस्था झालेली नाही, ही दैना आहे. बऱ्याच ठिकाणी व्यवस्था जरूर आहे. पण, त्याचा वापर महिला करू शकतात का, हा प्रश्न प्रत्येक पुरुषाने आपल्या घरातील महिलांचा विचार करून उत्तर देणे अपेक्षित आहे. याबाबत ‘चांगुलपणाची चळवळ’ देशभरात राबविण्याचा मुहूर्त महिला दिनी ७ मार्च रोजीचा निवडण्यात आला आहे. त्या अनुषंगाने देशभरात ऑनलाईन याचिकेवर स्वाक्षरी मोहीम राबविण्यात येणार असल्याची माहिती पुरोहित यांनी दिली. त्यासाठी एका समितीचे गठन करण्यात आले आहे. शिवाय, खास महिलांसाठी शहराच्या विविध ठिकाणी महिला शौचालये उभारण्याची व त्यांच्या स्वच्छता निरंतर होत राहावी, या बाबतीचे निवेदन महापौर, जिल्हाधिकारी, मनपा आयुक्त यांना देण्यात आल्याचेही त्यांनी सांगितले. पत्रपरिषदेला समितीचे नीलिमा बावणे, सारिका पेंडसे, छाया शुक्ला, सुप्रिया मंगरूळकर, शैलजा पिंगळे, संजय पेंडसे, डॉ. रवी गिऱ्हे, दत्ता फडणवीस उपस्थित होते.
......