कळमन्यातील घटना : आरोपी फरार
लोकमत न्यूज नेटवर्क
नागपूर : बकरी चोरणाऱ्या टोळीने एका व्यक्तीला चाकूने भोसकले आणि त्याच्या जवळची बकरी हिसकावून नेली. कळमना पोलीस ठाण्याच्या हद्दीत शनिवारी दुपारी दोनच्या सुमारास ही घटना घडली. चंदन अरुण खैरकर (वय ४१) असे जखमीचे नाव आहे. चंदन कळमन्यातील शिवकृपा हौसिंग सोसायटीत राहतात. त्यांच्याकडे बकरी असून, ते स्वतःच त्यांना चारायला घेऊन जातात.
शनिवारी दुपारी ते हस्तिनापूर वीटभट्टीजवळ आपल्या बकऱ्यांना चारत होते. तेवढ्यात तेथे आरोपी चेतन ठाकूर, शोएब खान आणि त्यांचा एक साथीदार दुचाकीवर बसून आले. त्यांनी चंदनच्या समोर असलेल्या कळपातून एक बकरी उचलली आणि पळू लागले. चंदनने आरोपींकडे धाव घेऊन त्याचा विरोध केला. ते पाहून आरोपी शोएब खानने चाकू काढून चंदनला भोसकले आणि बकरी घेऊन पळून गेले. या हल्ल्यात चंदन जबर जखमी झाले. त्यांना रुग्णालयात दाखल करण्यात आले असून, मिळालेल्या माहितीवरून कळमना पोलिसांनी आरोपींविरुद्ध गुन्हा दाखल केला. पुढील तपास सुरू आहे.
---