नागपूर : अमेरिकेतील एका कंपनीने भारतातील विविध पायाभूत सुविधांच्या प्रकल्पांमध्ये ५०० अब्ज डॉलर्सची गुंतवणूक करण्याची इच्छा दर्शविली असून, यासंदर्भात एक वेगळाच फंडा अंगीकारला आहे. कंपनीने चक्क एका इंग्रजी वृत्तपत्रात मोठी जाहिरात देऊन पंतप्रधान नरेंद्र मोदी यांनी यासाठी संधी द्यावी, असे आवाहन केले आहे. विशेष म्हणजे संबंधित कंपनी ही फारशी नावाजलेली नसून त्या कंपनीबाबत विविध प्रश्न उपस्थित करण्यात येत आहेत.
लँडमस रिएलिटी व्हेंचर्स असे या कंपनीचे नाव आहे. संबंधित कंपनीने थेट पंतप्रधानांना उद्देशूनच जाहिरात जारी केली आहे. एनआयपी व नॉन एनआयपी प्रकल्पांमध्ये ५०० अब्ज डॉलर्सची गुंतवणूक करण्याची इच्छा संबंधित कंपनीने दर्शविली आहे. इंडिया इन्व्हेस्टमेंट ग्रीडअंतर्गत येणारे प्रकल्प पूर्ण करण्याचा उद्देश असल्याचे कंपनीने म्हटले आहे. देशाच्या अर्थव्यवस्थेला ५ ट्रिनियन डॉलर्सच्या टप्प्यावर नेण्यासाठी कंपनीला गुंतवणुकीची संधी द्यावी, असे आवाहन चेअरमन प्रदीपकुमार एस. यांनी केले आहे. मात्र, ही कंपनी फारशी नावाजलेली नाही. कंपनी खरोखरच अमेरिकेतील आहे की नाही, याबाबतही शाश्वती नाही. असे असताना सरकारचे लक्ष आकर्षित करण्याचा हा फंडा आहे, की यामागे आणखी काही विशेष गणित आहे, असे प्रश्न उपस्थित होत आहेत.
मार्केटिंगसाठी कोरोनामुक्तीचा दावा ?
देश कोरोनाच्या विळख्यात सापडला असताना कंपनीने पूर्ण भारताला कोरोनामुक्त करण्याचा आराखडा असल्याचा दावा करीत आराखडा सादरीकरणाची संधी द्यावी, असे म्हटले आहे. मात्र, संबंधित कंपनी अमेरिकेतील आहे तर मग तेथील सरकारला कोरोनामुक्तीसाठी मदत करण्यासाठी योगदान का दिले नाही, तसेच मोठमोठ्या वैद्यकीय तज्ज्ञांना जे जमले नाही ते एक कंपनी कसे काय करून दाखविणार, असे सवाल उपस्थित होत आहेत.
अधिकारी भारतातील, पत्ता बंगळुरूचा
संबंधित कंपनीच्या संकेतस्थळाची पाहणी केली असता केवळ एका वेबपेजमध्ये माहिती आहे. चमूमध्ये प्रदीप कुमार यांच्या कुटुंबियांसह पाच व सल्लागार म्हणून पाच जणांची नावे आहेत; परंतु याअगोदर केलेले प्रकल्प, कंपनीची बॅलेन्सशीट, इतिहास याबाबत कुठलीही माहिती उपलब्ध नाही. कंपनीचे कार्यालय न्यू जर्सी येथे असल्याचे संकेतस्थळावर सांगण्यात आले आहे. मात्र, विविध कंपन्यांची विस्तृत माहिती उपलब्ध करून देणाऱ्या एका संकेतस्थळानुसार या कंपनीचा भारतातील पत्ता बंगळुरू येथील असून, कंपनी २०१५ मध्ये स्थापन झाली आहे. कंपनीची सुरुवातीची गुंतवणूक १० लाखांची होती, तर पेड अप कॅपिटल अवघ्या एका लाखाचे आहे. एखाद्या स्टार्टअपइतकी भारतात गुंतवणूक असताना या कंपनीची इतकी अवाढव्य गुंतवणूक करणारी जाहिरात कोड्यात टाकणारी आहे.