विजयोत्सव : कार्यकर्त्यांचा जल्लोष
नागपूर : ‘भारतीय जनता पार्टीचा विजय असो’ ‘नितीनजी गडकरी आगे बढो..’, अशा घोषणा देत, फटाक्यांच्या आतषबाजीत, ढोलताशांचा गजरात, गुलाल उधळीत, पेढे भरवत नागपूर लोकसभेचे उमेदवार नितीन गडकरी यांची विजयी रॅली आज शुक्रवारी मोठय़ा जल्लोषात निघाली. भाजपाचे झेंडे घेऊन हजारो कार्यकर्ते दुचाकीवर स्वार होते. त्यांचा उत्साह अवर्णनीय होता. ‘नयी सोच, नयी उम्मीद’ लिहिलेल्या खुल्या जीपमधून गडकरी सर्वांचे हात जोडून आभार मानत होते. विजयाची खूण दाखवित होते. ‘अबकी बार मोदी सरकार..जय-जय-जय-जय-जय हो , जय हो या गीतावर’ तरुण बेधुंद नाचत होते. या चौकात भाजपाच्या महिला कार्यकर्त्यांनी गडकरी यांचे आरती ओवाळून मिठाईचे वाटप केले.
सायंकाळी ५ वाजता कळमना चौकातून रॅलीला सुरुवात झाली. गडकरी यांच्या खुल्या जीपमध्ये आ. कृष्णा खोपडे, आ. विकास कुंभारे, आ. सुधाकर देशमुख, महापौर प्रा. अनिल सोले, माजी महापौर अर्चना डेहनकर सहभागी होत्या. आ. खोपडे हे ध्वनिक्षेपकांमधून लोकांचे आभार मानत होते. रॅलीच्या मार्गावर विविध संस्था, मंडळे, नगरसेवक, कार्यकर्ते रॅलीच्या प्रतीक्षेत होते. रॅली जवळ येताच फटाक्यांची आतषबाजी, पुष्पांचा वर्षाव आणि गुलाल उधळीत रॅलीचे स्वागत होत होते. ठिकठिकाणी गडकरींना ओवळल्या जात होते, पेढे भरवण्यात येत होते. कळमना चौकातून रॅली वर्धमानगर चौकात येताच एकच जल्लोष झाला. येथे पक्षाकडून सर्वांना लहान मोठी झेंडे, दुप्पटे वितरीत करण्यात आले. हजारो कार्यकर्त्यांच्या हातात झेंडे आल्याने रॅलीचे रूपच पालटले. कार्यकर्त्यांचा उत्साहाला उधाण आले.
रॅलीमध्ये महिलांची, ज्येष्ठांची उपस्थिती लक्षणीय होती. चौकाचौकात सामान्य जनताही यात सहभागी होऊ लागली. रस्त्याच्या दोन्ही बाजूला लोक गर्दी करून गडकरींना शुभेच्छा देत होते. काही जण मोबाईलमध्ये हा क्षण कैद करीत होते. वर्धमाननगर चौकातून रॅली हरीहर मंदिर रोडने लकडगंज चौकात आली. येथे गुलाबाच्या पाकळ्यांनी रॅलीचे जोरदार स्वागत झाले. चौकात लावलेला डीजेमधील
पुढे ही रॅली सतरंजीपुरा चौकातून, क्वेटा कॉलनी चौकात आली. येथे क्वेटा नवरात्र महोत्सव समितीच्यावतीने पुष्पांचा वर्षाव करण्यात आला. लाडूचे वाटप करण्यात आले. येथून ही रॅली टेलिफोन एक्सचेंज चौक होत, सीए रोडने गंगाबाई घाट चौक होऊन बडकस चौकात आली. (प्रतिनिधी)
वर्धमाननगर मार्गावर
एक मूक संवाद
वर्धमाननगर चौकातून रॅली मार्गक्रमण करीत असताना मागून आलेल्या एका कारमधून एक हात उंचावला. गडकरींचे लक्ष त्या कारकडे गेले. नजरानजर झाली. स्मित केले. तुझ्यामुळे जिंकलो..मनातल्या मनात तो मूक संवाद.. डोळ्यातून व्यक्त होत होता. त्यांचा विजयी जल्लोष पाहत त्या भारावून गेल्या होत्या. गर्दीमुळे जीप समोर निघाली, कार जागेवरच थांबली. त्यामध्ये होत्या गडकरी यांच्या पत्नी कांचन गडकरी.