गडचिरोली : १६ व्या लोकसभा निवडणुकांमध्ये गडचिरोली-चिमूर लोकसभा मतदार संघात तब्बल २४ हजार ८८८ मतदारांनी नोटाचा वापर केला आहे. राज्यात नोटाचा सर्वाधिक वापर गडचिरोली जिल्ह्यात झाला असा सूर उमटला आहे. मात्र जिल्ह्यात आदिवासीबहुल भागांमध्ये मतदारांच्या अज्ञानामुळे हा प्रकार घडला, असे मत विविध राजकीय पक्षाचे लोक व्यक्त करीत आहेत. या निवडणुकीत प्रथमच निवडणूक आयोगाकडून नोटाचा वापर करण्याची संधी देण्यात आली होती. गडचिरोली-चिमूर या मतदार संघात २४ हजार ४८८ मतदारांनी नोटाचा वापर केला. यामध्ये आमगाव विधानसभा क्षेत्रात ३,०९६, आरमोरीमध्ये ४,३०७, गडचिरोलीमध्ये ४,५२०, अहेरीमध्ये ७,५४४, ब्रम्हपूरीमध्ये २,५६१, चिमूरमध्ये २,४५१ मतदारांनी नकाराधिकाराचा वापर केला आहे. तर ९ मतदारांनी पोस्टल मतदानाच्या माध्यमातून नोटा मतदानाचा हक्क बजावला आहे. सर्वाधिक नकाराधिकार मताचा वापर अहेरी विधानसभा क्षेत्रात झाल्याचे दिसून येत आहे. अहेरी विधानसभा क्षेत्रात अहेरी, भामरागड, सिरोंचा, एटापल्ली, मुलचेरा हे तालुके येतात. या तालुक्यांमध्ये दुर्गम व अतिदुर्गम अनेक तालुके आहेत. या भागात मतदार ईव्हीएम मशीनवर पहिल्या किंवा शेवटच्या क्रमांकाच्या बटनांचा अधिक वापर करतात, असे निवडणुकांमध्ये अनेकदा घडलेले आहे. गडचिरोली चिमूर क्षेत्रात पहिल्या क्रमांकावर यंदा भाजप उमेदवाराचे नाव तर शेवटच्या क्रमांकावर नोटाचे बटन होते. ग्रामीण भागातील नागरिकांनी शेवटच्या बटनवर हे मतदान केले. त्यांना नोटा काय आहे याची जाणीवही नव्हती, असे राजकीय पक्षांच्या जाणकारांचे म्हणणे आहे. त्यामुळे अहेरी या एकाच विधानसभा क्षेत्रात ७ हजारावर अधिक मतदारांनी नोटाचा वापर केला. हे दिसून येते. इतर शहरी भागातील विधानसभा क्षेत्रात मात्र नोटाचे मतदान राज्याच्या इतर भागासारखेच झालेले आहेत. तसेही गडचिरोली-चिमूर या लोकसभा मतदार संघात विविध सामाजिक संघटनांनी नोटा मतदानाच्या अधिकाराबाबत जनजागृती मोहीम राबविली होती. (जिल्हा प्रतिनिधी)
गडचिरोली-चिमूर लोकसभा क्षेत्रात नोटाचा अधिक वापर
By admin | Updated: May 20, 2014 00:59 IST