लाेकमत न्यूज नेटवर्क
पारशिवनी : तालुक्यातील १० ग्रामपंचायतींच्या सरपंच व उपसरपंच पदासाठी गुरुवारी (दि. ११) निवडणूक घेण्यात आली. त्यात चार ग्रामपंचायतींवर महाविकास आघाडी तर प्रत्येकी तीन ग्रामपंचायतींवर शिवसेना व काँग्रेस समर्थित गटांच्या उमेदवारांनी बाजी मारली. परिणामी, भाजप समर्थित गटाला एकाही ग्रामपंचायतीवर सत्ता प्रस्थापित करता आली नाही. यानिमित्ताने पारशिवनी तालुक्यात महाविकास आघाडीतील घटक पक्षांमधील नेते व कार्यकर्त्यांमध्ये समन्वय व एकजूट दिसून आली.
पिपळा येथे महाविकास आघाडी समर्थित गटात एकजूट दिसून आली. येथे सरपंचपदी सचिन आमले तर उपसरपंचपदी गौतम गजभिये यांची निवड करण्यात आली. ईटगाव ग्रामपंचायतीवर शिवसेना समर्थित गटाने सत्ता संपादन केली. येथे सरपंचपदी अतुल काळे तर उपसरपंचपदी ज्ञानेश्वर वासे यांची वर्णी लागली. आमगाव येथे माया गाेरले सरपंचपदी तर रमेश शिवणकर उपसरपंचपदी विजयी झाले. माहुली ही पारशिवनी तालुक्यातील माेठी व भाजप समर्थित गटाचा गड मानली जाणारी ग्रामपंचायत हाेय. या निवडणुकीत महाविकास आघाडी समर्थित गटाने भाजप समर्थित गटाचा धुव्वा उडविला. येथे सरपंचपदी काँग्रेस समर्थित गटाचे प्रेमचंद कुसुंबे तर उपसरपंचपदी शिवसेना समर्थित गटाच्या माया अमृते यांनी बाजी मारली.
नवेगाव खैरी येथे कमलाकर कोठेकर सरपंच तर राजू पुरकाम यांची उपसरपंचपदी वर्णी लागली. खेडी येथे या वेळी महिलाराज आले. येथील सरपंचपदी काँग्रेस समर्थित गटाच्या छाया कोकाटे व उपसरपंचपदी संगीता इंगळे या विराजमान झाल्या. निमखेडा येथे सरपंचपदासाठी काँग्रेस समर्थित गटाच्या कला तडस यांना ईश्वरचिठ्ठीने काैल दिला तर उपसरपंचपदी देवा डोंगरे यांनी बाजी मारली. सुवरधरा येथे आदिवासीबहुल गाव असून, येथे शिवसेना समर्थित गटाने एकहाती सत्ता प्रस्थापित केली. येथे सरपंचपदी केशवंता इडपा तर उपसरपंचपदी गजू सावरकर यांनी विजय संपादन केला. खंडाळा (घटाटे) येथे महाविकास आघाडी समर्थित गटाच्या विमल बोरकुटे यांनी सरपंच तर चेतन कुंभलकर यांनी उपसरपंचपदाच्या निवडणुकीत बाजी मारली.
....
सदस्यांवर नेत्यांचे लक्ष
सरपंच व उपसरपंचपदाची निवडणूक जवळ येताच राजकीय नेत्यांनी त्यांच्या ग्रामपंचायत सदस्यांना सुरक्षित स्थळी नेले हाेते. नवनिर्वाचित सदस्य विराेधकांच्या संपर्कात येणार नाहीत, याची काळजीही घेतली हाेती. गुरुवारी दुपारी निवडणूक प्रक्रिया सुरू हाेताच सर्व सदस्यांना त्यांच्या गावांमध्ये आणले हाेते. निवडणूक प्रक्रिया पूर्ण हाेऊन निकाल जाहीर हाेईपर्यंत या सदस्यांवर त्यांच्या नेत्यांनी बारकाईने लक्ष ठेवले हाेते. त्यामुळे कुणालाही बंडखाेरी करण्याची अथवा विराेधात जाण्याची संधी मिळाली नाही.
....
बोरी (सिंगारदीप) येथील सरपंचपद रिक्त
बोरी (सिंगारदीप) येथील सरपंचपद अनुसूचित जाती महिलाकरिता राखीव करण्यात आले होते. वास्तवात, येथे या प्रवर्गातील उमेदवारच नसल्यामुळे सरपंचपदाची निवडणूक हाेऊ शकली नाही. त्यामुळे सेथील सरपंचपद रिक्त आहे. येथे शिवसेना समर्थित गटाच्या शुभांगी डोहणे यांनी उपसरपंचपदाची निवडणूक जिंकली. तालुक्यातील या १० गावांंपैकी एकाही गावात भाजप समर्थित गटाला त्यांचा सरपंच निवडून आणता आला नाही. भाजप कार्यकर्त्यांनी त्यांच्यातील अंतर्गत मतभेदाचे खापर वरिष्ठ नेत्यांवर फाेडले.