लोकमत न्यूज नेटवर्क
नागपूर : मोटारसायकलवरून गांजाची तस्करी करणाऱ्या आरोपीला तहसील पोलिसांनी जेरबंद केले. रविवारी रात्री १०.१५ वाजता टिमकीच्या तीन खंबा चाैकाजवळ पोलिसांनी ही कारवाई केली. तहसील पोलिसांचे पथक गस्तीवर असताना त्यांना टिमकी भागातून एक व्यक्ती संशयास्पद अवस्थेत जाताना दिसला. इशारा करूनही तो न थांबता वेगात निघून गेल्याच्या संशयावरून पोलिसांनी त्याचा पाठलाग करून त्याला तीन खंबा चाैकात पकडले. चाैकशीत त्याचे नाव शेख ईरशाद शेख मोहम्मद (वय ५५, रा. संघर्षनगर, मेहंदीबाग, कॉलनी) असल्याचे स्पष्ट झाले. त्याच्या मोटारसायकलवर असलेल्या खरड्याच्या खोक्याची तपासणी केली असता त्यात साडेपाच किलो गांजा आढळला. बाजारात त्याची किंमत ५४ हजार, ३६० रुपये आहे. हा गांजा आणि मोटारसायकल असा एकूण ७९, ३६० रुपयांचा मुद्देमाल पोलिसांनी जप्त केला. ईरशादविरुद्ध अमली पदार्थविरोधी कायद्यानुसार गुन्हा दाखल करण्यात आला. ठाणेदार जयेश भांडारकर, पोलीस निरीक्षक बलीराम परदेशी यांच्या मार्गदर्शनाखाली उपनिरीक्षक एस. एस. मस्के, हवालदार लक्ष्मण शेंडे आणि त्यांच्या सहकाऱ्यांनी ही कामगिरी बजावली.