नागपूर : १६ हजार हेक्टरवर पसरलेल्या गोसेखुर्द जलाशयात मासेमारीला बंदी आहे. परंतु जलाशयातून मोठ्या प्रमाणात अवैध मासेमारी जोरात सुरू आहे. मत्स्य माफियांनी आंध्र प्रदेशातून मासेमाऱ्यांना आणून, त्यांच्याकडून मोठ्या प्रमाणात मासेमारी करून घेतली जात आहे. स्थानिक लोकांना मात्र विरोध करण्यात येत आहे. अवैध मासेमारीमुळे शासनाचा मोठ्या प्रमाणात महसूल बुडत असून, यावर कुणाचाही अंकुश नाही. गोसेखुर्द प्रकल्पात मोठ्या प्रमाणात गावे गेली आहेत. काही गावांचे पुनर्वसन झाले असून, काही गावकऱ्यांना शासनाने दिलेल्या आश्वासनानुसार मोबदला न मिळाल्याने गावकरी गावातच थांबले आहेत. १६,३०१ हेक्टरवर पसरलेले जलाशय मत्स व्यवसायाला अनुकुलता आहे. परंतु जलाशयात मासेमारीला बंदी आहे. जलाशयातील मास्यांची उपलब्धता लक्षात घेता, काही मत्स माफियाच्या माध्यमातून मोठ्या प्रमाणात अवैध मासेमारी होत आहे. जलाशयाला लागून असलेल्या सालेसरी, सालेभट्टी, पात्री, टेकेपार, मरुपार, गोठणगाव या भागात मोठ्या प्रमाणात अवैध मासेमारी सुरू आहे. मत्स माफियांकडून या भागात आंध्रप्रदेशातून पट्टीच्या मासेमारांना येथे आणले आहे. या मासेमाऱ्यांचे कुटुंब येथे पिंजरा टाकून मासेमारी करीत आहे. माफियाकडून मासेमारांना थोडेथोडके पैसे देऊन लाखो रुपयांचा माल येथून उचलत आहेत. उमरेडच्या जंगलातून हा अवैध प्रकार सुरू आहे. परिसरातील स्थानिक मासेमारांना मात्र, जलाशयात मासेमारी करण्याला विरोध करण्यात येतो. येथील मासेमाऱ्यांच्या बोटी पळविण्यात येत आहेत. त्यांच्या तक्रारीची कुणीही दखल घेत नाही. या सर्व प्रकारावर कुणाचाही अंकुश नाही. हा तलाव प्रकल्पग्रस्तांना मासेमारीसाठी उपलब्ध करून द्यावा, अशी मागणी स्थानिक मासेमाऱ्यांकडून होत आहे. मोठ्या नेत्यांचा पाठिंबागोसेखुर्द जलाशयात फोफावलेल्या अवैध मासेमारीला मोठ्या नेत्यांकडून पाठींबा मिळत असल्याचा आरोप येथील स्थानिकांनी केला आहे. जंगलामधून हा प्रकार सुरू असतानाही, कुठेही त्यांची अडवणूक होत नाही. तक्रार करायला गेल्यास कोणी तक्रारीची दखल घेत नाही. स्थानिक प्रशासनसुद्धा याकडे डोळेझाक करीत आहे. आंध्रचे मासेमार आणून आमच्या पोटावर घाला घातला असल्याचे नागरिकांचे म्हणणे आहे.
गोसेखुर्दवर मत्स्य माफियांचे जाळे
By admin | Updated: April 25, 2016 02:35 IST