नागपूर : खर्रा आणि ४० रुपये उधार न दिल्यामुळे संतापलेल्या व्यक्तीने मुलाच्या मदतीने एका युवकावर जीवघेणा हल्ला केला. ही घटना मंगळवारी रात्री कपिलनगर पोलीस ठाणे हद्दीत घडली. जितेंद्र ऊर्फ जितू जनबंधू (४८) आणि रोहित जितेंद्र जनबंधू (२६) अशी आरोपींची नावे आहेत. कपिलनगर येथील रहिवासी २० वर्षीय गौरव अनिल उईके मंगळवारी रात्री ८ वाजता त्याचा मित्र प्रणयसोबत त्याच्या घरासमोर बसला होता. त्याचवेळी जितेंद्र तिथे आला. त्याने गौरवला ४० रुपये उधार आणि खर्रा मागितला. गौरवने देण्यास नकार दिला. यामुळे जितेंद्रने गौरवला दोन झापड मारल्या आणि शिवीगाळ करून निघून गेला. काही वेळानंतर तो पुन्हा आपल्या मुलाला घेऊन आला. दोघांनी त्याच्या डोक्यावर वार करून त्याला जखमी केले. या घटनेमुळे परिसरात खळबळ उडाली. नागरिकांनी गौरवला रुग्णालयात दाखल केले. कपिलनगर पोलिसांनी गुन्हा दाखल करून जितेंद्रला अटक केली.
-----------
जखमी वृद्ध महिलेचा मृत्यू
नागपूर : रस्ता अपघातात जखमी झालेल्या वृद्ध महिलेचा मृत्यू झाला. नर्मदा रमेश तिवारी (७६) रा. नंदनवन झोपडपट्टी या ३ डिसेंबर रोजी मुलासोबत दुचाकीने कामठीला जात होत्या. कपिलनगरातील शारद चौकाजवळ यूटर्न घेताना बाईकला अज्ञात ॲक्टिव्हा वाहनचालकाने धडक दिली. यात तिवारी आणि त्यांचा मुलगा खाली पडले. डोक्याला गंभीर मार बसल्याने तिवारी यांच्यावर खासगी रुग्णालयात उपचार सुरू हाेते. मंगळवारी त्यांचा मृत्यू झाला. कपिलनगर पोलिसांनी अपघाताचा गुन्हा दाखल केला आहे.
-----------------