मनपाची क्लीन चिट : कचरा उचलण्यासाठी महिन्याला देणार सव्वादोन कोटी नागपूर : कनक रिसोर्सेस कंपनीकडून खोट्या माहितीच्या आधारे जादाची रक्कम घेतल्याचा ठपका ठेवून पैसे वसुलण्याची शिफारस करण्यात आली होती. यावर आयुक्तांनी कंपनीला नोटीस बजावून कंत्राट रद्द का करण्यात येऊ नये, अशी विचारणा केली होती. असे असतानाही कचरामुक्त शहर योजना राबविण्यासाठी पुन्हा एकदा कनक रिसोर्सेसवर विश्वास व्यक्त करण्यात आला आहे. कंपनीने सादर केलेल्या प्रस्तावाला स्थायी समितीने मंजुरी प्रदान केली आहे. याअंतर्गत कचरा उचलण्यासाठी महापालिका कनक रिसोर्सेसला महिन्याला सव्वादोन कोटी रुपये देणार आहे. या निर्णयामुळे महापालिकेने एकप्रकारे कनक रिसोर्सेस कंपनीला क्लीन चिट दिली आहे.
शहरातील कचरा उचलण्याचे कंत्राट २००९ मध्ये कनक रिसोर्सेस कंपनीला देण्यात आले होते. १० वर्षाचा करार असला तरी पाच वर्षांनी त्यासाठी प्रशासकीय मान्यता घेणे आवश्यक आहे. त्यानुसार पुढील पाच वर्षांसाठी कनक रिसोर्सेस कंपनीला कंत्राट देण्याचा प्रस्ताव स्थायी समितीसमोर आला होता. २७ कोटी याप्रमाणे पाच वर्षाकरिता १३५ कोटी रुपये देण्यात येणार आहेत. दरम्यान कंपनीने खोट्या माहितीच्या आधारे जादाची रक्कम घेतल्याचा खुलासा आॅडिटमध्ये झाला होता. ही रक्कम वसूल करण्याची शिफारस आॅडिटमध्ये करण्यात आली होती. त्यानुसार आयुक्त श्याम वर्धने यांनी कंपनीला नोटीस बजावली होती. तत्कालीन स्थायी समिती अध्यक्ष अविनाश ठाकरे यांच्यासमोर हा प्रस्ताव मंजुरीसाठी आला होता.
मात्र, कंपनीला कंत्राट रद्द करण्याची नोटीस बजावून खुलासा मागविण्यात आला असल्याने या प्रस्तावाला मान्यता देण्यात आली नाही. गुरुवारी पुन्हा तोच प्रस्ताव स्थायी समितीच्या बैठकीत आला असता स्थायी समितीच्या बैठकीत प्रस्तावाला मंजुरी प्रदान करीत एकप्रकारे प्रशासनाने कनक रिसोर्सेस कंपनीला क्लीन चिट दिली आहे. (प्रतिनिधी)