लोकमत न्यूज नेटवर्क
नागपूर : फेसबुकवर ओळख झाल्यानंतर ते दोघे एकमेकांच्या सलग संपर्कात राहू लागले. नंतर त्यांनी प्रेमविवाह केला आणि आता त्याने कोल्ड्रिंकमध्ये गुंगीचे औषध देऊन बेशुद्ध करून बलात्कार केला, अशी तक्रार तिने पोलिसांकडे नोंदविली. हे अजबगजब प्रकरण जरीपटक्यातील आहे.
मोहम्मद इर्शाद इकबाल मिर्झा (वय ३३), असे या प्रकरणात आरोपी ठरलेल्याचे नाव आहे. तो मेकोसाबाग ख्रिश्चन कॉलनीत राहतो. तक्रार करणारी महिला ३१ वर्षांची आहे. तिची आणि रेल्वेत नोकरी करणाऱ्या इर्शादची ओळख फेसबुकवर दोन वर्षांपूर्वी झाली होती. तेव्हापासून ते सलग संपर्कात होते. त्यांच्या भेटीगाठी वाढल्या. त्यांनी नंतर प्रेमविवाह केला. तिला गर्भधारणाही झाली. नंतर मात्र त्यांच्या प्रेमाचा कैफ उतरला. दोघे भांडू लागले. त्यांच्यातील वाद वाढतच गेला. त्यांच्यात समेट व्हावा म्हणून दोघांच्याही नातेवाइकांनी प्रयत्न केले. मात्र, त्यांचा समेट झाला नाही. आरोप-प्रत्यारोप सुरूच राहिली. अखेर ती शुक्रवारी जरीपटका ठाण्यात पोहोचली.
पोलिसांकडे दिलेल्या तक्रारीत तिने म्हटले की,
‘९ सप्टेंबर २०१९ ला इर्शादने घरी बोलावले आणि कोल्ड्रिंकमध्ये गुंगीचे औषध देऊन बेशुद्ध केले. त्यानंतर त्याने बलात्कार केला. त्याचवेळी अश्लील फोटो, तसेच व्हिडिओ क्लिप तयार करून त्या व्हायरल करण्याची धमकी देऊन दोन वर्षांपासून तो वारंवार बलात्कार करीत होता. गर्भधारणा झाल्यानंतर तो तिला गर्भ पाडण्याची धमकी देत होता’, असे महिलेने तक्रारीत नमूद केले आहे. तिच्या तक्रारीवरून जरीपटका पोलिसांनी आरोपी इर्शादविरुद्ध बलात्काराचा गुन्हा दाखल केला. पुढील तपास सुरू आहे.