सातव्या वेतन आयोगात रेल्वे कर्मचाऱ्यांचा अपेक्षाभंग

सातव्या वेतन आयोगात रेल्वे कर्मचाऱ्यांचा अपेक्षाभंग झाला असून यात कर्मचाऱ्यांचे ५२ प्रकारचे भत्ते कमी करण्यात आले आहेत.

वेणु नायर यांची माहिती : आंदोलनासाठी ११ डिसेंबरला बैठकीचे आयोजननागपूर : सातव्या वेतन आयोगात रेल्वे कर्मचाऱ्यांचा अपेक्षाभंग झाला असून यात कर्मचाऱ्यांचे ५२ प्रकारचे भत्ते कमी करण्यात आले आहेत. त्यामुळे या विषयावर आंदोलनाची दिशा ठरविण्यासाठी ११ डिसेंबरला दिल्लीत एका बैठकीचे आयोजन करण्यात आले असून बैठकीत ठोस निर्णय घेण्यात येईल, अशी माहिती नॅशनल रेल्वे मजदूर युनियनचे मुंबई मुख्यालयातील महामंत्री वेणु नायर यांनी पत्रकार परिषदेत दिली.नॅशनल रेल्वे मजदूर युनियनचे महामंत्री वेणु नायर म्हणाले, सातव्या वेतन आयोगाची अंमलबजावणी १ जानेवारी २०१४ पासून करण्याची संघटनेची मागणी होती. परंतु ही अंमलबजावणी १ जानेवारी २०१६ पासून करण्यात येणार आहे. कर्मचाऱ्यांच्या रजेत कुठलाही बदल करण्यात आलेला नसून बोनसही ३ हजार ५०० वरुन फक्त ७ हजार करण्यात आला आहे. घरभाडे भत्त्यातही ३० वरून २४ टक्के कपात करण्यात आली आहे. वेतनवाढही ५ टक्क्यांवरून ३ टक्के करण्यात आली आहे. महत्त्वाची बाब म्हणजे वेतनवाढीचा निर्णय अधिकारी घेणार आहेत. त्यामुळे अधिकाऱ्यांच्या बंगल्यावर काम करणाऱ्या रेल्वे कर्मचाऱ्यांना चांगली वेतनवाढ आणि उन्हातान्हात राबणाऱ्या कर्मचाऱ्यांना कमी वेतनवाढ अशी परिस्थिती निर्माण होणार असल्याची माहिती त्यांनी दिली.पत्रकार परिषदेला नितीन प्रधान, ‘एनआरएमयु’चे विभागीय सचिव हबीब खान उपस्थित होते. (प्रतिनिधी)