उमरेड : रुग्ण बरा होण्यासाठी डॉक्टर संपूर्ण प्रयत्न करीत असतात. जीवाची पर्वा न करता जोखीम घेत रुग्णांवर औषधोपचारासाठी सज्ज असतात. अशावेळी एखादी दुर्घटना ओढवली, रुग्णाचा मृत्यू झाला तर शिवीगाळ, मारहाण, तोडफोड आणि डॉक्टरवर जीवघेणा हल्ला या संपूर्ण कठीण परिस्थितीचा सामना आम्हास करावा लागतो. अशावेळी या संपूर्ण घटनांना आळा बसविण्यासाठी केंद्र सरकारने केंद्रीय आरोग्य सेवक रक्षक कायदा लागू करावा, अशी मागणी उमरेडच्या आयएमए शाखेने निवेदन सोपवीत केली. प्रभारी उपविभागीय अधिकारी प्रमोद कदम यांच्यामार्फत पंतप्रधान नरेंद्र मोदी यांच्या नावाने निवेदन सोपविण्यात आले. राज्य सरकारने डॉक्टर संरक्षण कायदा अंमलात आणला. या कायद्याचा फारसा परिणाम दिसून येत नाही, असेही निवेदनात म्हटले आहे. वाढत्या हल्ल्याच्या निषेधार्थ केंद्र सरकारने केंद्रीय आरोग्य सेवक रक्षक कायदा तातडीने लागू करावा, यासाठी अनेकदा आंदोलने, मोर्चा, निषेध दिन पाळण्यात आला. अद्याप यावर केंद्र सरकारने कोणतेही पाऊल उचलले नाही. डॉक्टरांनी राष्ट्रीय निषेध दिवस पाळत पुन्हा एकदा या समस्येकडे निवेदनाच्या माध्यमातून लक्ष वेधले. यावेळी शिष्टमंडळासोबत आयएमएचे अध्यक्ष डॉ. शिरीष मेश्राम, डॉ. शशिकांत जयस्वाल, डॉ. के. बी. सुरकर, डॉ. आशा जयस्वाल, डॉ. प्रदीप बाकडे, डॉ. सतीश वंजारी, डॉ. संजय ठवकर, डॉ. भाग्यश्री वंजारी, डॉ. मीनाक्षी बाकडे, डॉ. प्रवीण वसुले आदींची उपस्थिती होती.
----
उपविभागीय अधिकारी प्रमोद कदम यांच्याकडे निवेदन सोपविताना आयएमएचे पदाधिकारी.