लोकमत न्यूज नेटवर्क
नागपूर : राष्ट्रसंत तुकडोजी महाराज नागपूर विद्यापीठाच्या अधिष्ठातापदाची प्रतीक्षा अखेर संपली आहे. कुलगुरू डॉ. सुभाष चौधरी यांनी या पदावर चार जणांची नियुक्ती केली आहे. यात डॉ. राजश्री वैष्णव, डॉ. निर्मलकुमार सिंह, डॉ. राजेश सिंगरू, डॉ. संजय कविश्वर यांचा समावेश आहे.
विद्यापीठात गेल्या चार महिन्यापासून अधिष्ठातांची पदे रिक्त होती. यामुळे बऱ्याच अडचणी येत होत्या. अखेर या पदावर नियुक्ती झाली आहे. आंतरशास्त्रीय विद्याशाखेच्या अधिष्ठाता म्हणून पदव्युत्तर शिक्षण विभागाच्या प्रमुख डॉ. राजश्री वैष्णव, मानव्यशास्त्र शाखेत पदव्युत्तर लोकप्रशासन विभागाचे प्रमुख डॉ. निर्मलकुमार सिंह, वाणिज्य व व्यवस्थापन शाखेत तिरपुडे इन्स्टिट्यूट ऑफ मॅनेजमेंटचे प्राध्यापक डॉ. संजय कविश्वर आणि विज्ञान व तंत्रज्ञान शाखेत ताई गोळवलकर महाविद्यालयाचे प्राचार्य डॉ. राजेश सिंगरू यांची नियुक्ती झाली आहे.