नांद मध्ये पोटनिवडणुकीची नांदी

भिवापूर: ओबीसी आरक्षणावरून जिल्हा परिषद व पंचायत समिती सदस्यांच्या रिक्त झालेल्या जागांवर गतवेळी जाहीर झालेली पोटनिवडणूक रद्द झाल्यानंतर निवडणूक आयोगाने सोमवारी पुन्हा पोटनिवडणुकीचा कार्यक्रम जाहीर केला आहे. तालुक्यात पंचायत समितीच्या केवळ नांद गणात ही पोटनिवडणूक होणार आहे. ओबीसी आरक्षणाच्या विषयावरून नांद गणाच्या पंचायत समिती सदस्या नंदा नारनवरे यांचे सदस्यत्व रद्द झाले आहे. याच जागेसाठी निवडणूक आयोगाने पोटनिवडणूक जाहीर केली होती. नारनवरे तीन वेळा जिल्हा परिषद सदस्या तर दोन वेळा पंचायत समिती सदस्या राहिल्या आहेत. गत सार्वत्रिक निवडणुकीत काँग्रेसने उमेदवारी नाकारल्यामुळे त्या अपक्ष लढल्या होत्या. यात काँग्रेस, भाजप, सेनेला चारही मुंड्या चित करत त्यांनी विजयश्री मिळविला होती. मात्र सदस्यत्व रद्द झाल्यानंतर जाहीर झालेली पोटनिवडणूक लढण्यास त्यांनी असमर्थता दर्शविली होती. त्यामुळे नांद गणाकरिता माधुरी संजय देशमुख (काँग्रेस), शोभा मोरेश्वर चुटे (भाजप), वनिता संतोष घरत (शिवसेना), सुनिता अशोक वाघ (वंचित) या चार उमेदवारांनी उमेदवारी अर्ज दाखल केले होते. मात्र त्यानंतर ही पोटनिवडणूक रद्द झाली. निवडणूक आयोगाच्या आदेशानुसार आता पुन्हा याच जागांवर पोटनिवडणुकीचा कार्यक्रम जाहीर झाला असून आचारसंहिताही लागली आहे. गत पोटनिवडणुकीकरिता दाखल केलेल्या उमेदवारांचे अर्ज कायम राहणार आहे. ही पोटनिवडणूक असली तरी गृहतालुक्यातील एकमेव जागा काबीज करण्यासाठी आ. राजू पारवे कोणते कौशल्य दाखवितात याकडे सर्वांच्या नजरा असणार आहे. भाजपच्या हातून गेलेली जागा पुन्हा परत मिळविण्यासाठी माजी आ. सुधीर पारवे दंड थोपटणार आहे.