नागपूर : मुंबईतील कुख्यात डॉन अरुण गवळीने पॅरोल मिळण्यासाठी मुंबई उच्च न्यायालयाच्या नागपूर खंडपीठात याचिका दाखल केली आहे. त्याकरिता त्याने पत्नी गंभीर आजारी असल्याचे कारण दिले आहे. न्यायालयाने गुरुवारी राज्य सरकारला नोटीस बजावून या याचिकेवर ९ एप्रिलपर्यंत उत्तर सादर करण्याचे निर्देश दिले.
याचिकेवर न्यायमूर्तीद्वय झेड.ए. हक व अमित बोरकर यांच्यासमक्ष सुनावणी झाली. गवळीने पॅरोल मिळण्यासाठी सुरुवातीला विभागीय आयुक्तांकडे अर्ज सादर केला होता. गवळी गुन्हेगारांच्या टोळीचा म्होरक्या आहे. त्याला पॅरोलवर सोडल्यास कायदा व सुव्यवस्थेचा प्रश्न निर्माण होईल ही बाब लक्षात घेता, तो अर्ज ३ मार्च २०२१ रोजी नामंजूर करण्यात आला. त्यामुळे गवळीने उच्च न्यायालयात धाव घेतली आहे. विभागीय आयुक्तांचा निर्णय अवैध असल्याचे त्याचे म्हणणे आहे. यापूर्वी पॅरोलवर सुटल्यानंतर कायदे व नियमांचे काटेकोर पालन केले. परिणामी, यावेळीही पॅरोल नाकारता येणार नाही, असेदेखील त्याने याचिकेत नमूद केले आहे. गवळीला शिवसेनेचे नगरसेवक कमलाकर जामसांदेकर यांच्या खून प्रकरणात जन्मठेपेची शिक्षा झाली आहे. तो नागपूर मध्यवर्ती कारागृहात शिक्षा भोगत आहे. गवळीतर्फे अॅड. मीर नगमान अली यांनी कामकाज पाहिले.