:::::::::::::::::::::::::::::::::::::::::::::::::::::::::
काकावर फरशीने हल्ला
नागपूर : भांडण करण्यास मनाई करणाऱ्या काकालाच एका युवकाने फरशीने जखमी केले. भोसले नगर, जुना सक्करदरा येथील सोनू श्यामराव कोहळे हा मंगळवारी रात्री विनाकारण शिवीगाळ करून भांडण करत होता. हे पाहून त्यांच्या किरायेदाराने सोनूचे काका प्रवीण कोहळे यांनी भांडण न करण्याबद्दल समजाविण्यास सांगितले. ते सोनूला समजावत असतानाच संतापाच्या भरात त्याने काकाच्या डोक्यावर फरशीचे वार केला. यात ते गंभीर जखमी झाले. सक्करदरा पोलिसांनी याप्रकरणी गुन्हा दाखल केला आहे.
:::::::::::::::::::::::::::::::::::::::::::::::::::::::::
जरीपटका-यशोधरा नगरातील अवैध व्यवसायांवर कारवाई
नागपूर : झोन पाचमधील जरीपटका आणि यशोधरा नगरातील अवैध व्यवसायावर छापा घालून पोलिसांनी चौघांना पकडले आहे. झोन क्रमांक पाचचे डीसीपी नीलोत्पल यांच्या पथकाला इंदोरा येथील भंडारा मोहल्यात अमोल नरेश वासनिक (३८) याच्या पुढाकारात मटका चालविला जात असल्याचे कळले. यावरून एपीआय विजय भिसे, शिपाई सूरज भारती, दिनेश यादव, हरीश इंगळे, चेतन जाधव, रवींद्र राऊत यांनी सापळा रचून अमोलला रंगेहात पकडले. मोबाईसह ६,५०० रुपयांचा माल जप्त केला. गणेशलाल श्यामसुंदर साहू (६०) या बेझनबाग येथील व्यक्तीला दुचाकीवरून दारूची तस्करी करताना पकडले. ७ हजाराच्या दारूसह दुचाकी जप्त करण्यात आली. यशोधरा नगर ठाण्याचे पीएसआय जितेंद्र भार्गव यांनी यादव नगरातील जितेंद्र आनंद चवरे (३०) याच्या घरी धाड घालून दारू जप्त केली. सिद्धार्थनगरातील नकुल राजू पांडे (२२) हा संशयास्पद स्थितीत दिसला असता. त्याचा पाठलाग केला असता त्याच्याजवळ चाकू आढळून आला. त्याच्यावरही गुन्हा दाखल करण्यात आला आहे.