देवडिया काँग्रेस भवनात शुकशुकाट

काँग्रेसचा स्थापना दिवस असूनही बुधवारी देवडिया काँग्रेस भवन येथे पक्ष कार्यकर्त्यांची दरवर्षीसारखी वर्दळ नव्हती.

 स्थापना दिवसाप्रसंगी ना रोषणाई ना वर्दळ नागपूर : काँग्रेसचा स्थापना दिवस असूनही बुधवारी देवडिया काँग्रेस भवन येथे पक्ष कार्यकर्त्यांची दरवर्षीसारखी वर्दळ नव्हती. तसेच या इमारतीवर रोषणाई करण्यात आलेली नव्हती. एवढेच नव्हे तर पक्षाच्या पदाधिकाऱ्यांनीही भवनाकडे पाठ फिरविली. सकाळी ध्वजारोहण करण्यात आले की नाही, हे सांगण्यासाठी कोणीही पुढे येत नव्हते. दरम्यान, काँग्रेसच्या स्थापना दिवसानिमित्त शहरात एका ठिकाणी भव्य कार्यक्रमाचे आयोजन करण्यात आले होते. या कार्यक्रमाला काँग्रेसचे वरिष्ठ नेते, पदाधिकारी व कार्यकर्ते आवर्जून उपस्थित होते. परंतु ते देवडिया भवनाकडे फिरकले नाही. गेल्या वर्षी काँग्रेसच्या स्थापना दिवसाला देवडिया भवनावर रोषणाई करण्यात आली होती. ध्वजारोहण करण्यात आले होते. कार्यकर्त्यांची गर्दी होती. परंतु पक्षातील अंतर्गत गटबाजीमुळे यावेळी स्थापना दिवस असूनही देवडिया काँग्रेस भवनाकडे दुर्लक्ष करण्यात आल्याची माहिती सूत्रांनी दिली. चिटणीस पार्क नजीकच्या देवडिया काँग्रेस भवनाला विशेष महत्त्व आहे. शहराच्या इतिहासातही वेगळेच स्थान आहे. असे असतानाही स्थापना दिवसाला याकडे दुर्लक्ष केल्याने आश्चर्य व्यक्त केले जात आहे.(प्रतिनिधी)