लोकमत न्यूज नेटवर्क
नागपूर : आपत्तीमध्ये राज्य आपत्ती प्रतिसाद पथक (एसडीआरएफ)ची भूमिका महत्त्वाची असते. आपत्ती आली तर अडकलेल्या जखमी व्यक्तींचा शोध घेणे, त्यांच्यापर्यंत पोहोचणे व त्यांना स्थिर करून सुरक्षितरित्या घटनास्थळातून बाहेर काढणे, त्यांच्यावर प्रथमोपचार करणे तसेच पूरपरिस्थितीत पूर व अतिवृष्टीच्या पाण्यामध्ये अडकलेल्या व्यक्तींना शोधून काढणे, उंच इमारतीमध्ये अडकलेल्या लोकांचा बचाव करणे, भूकंपग्रस्त इमारतीमधील धोका दूर करून यामध्ये अडकलेल्या व्यक्तींना शोधणे त्यांच्यापर्यंत पोहोचवून त्वरित वैद्यकीय उपचारासाठी कशी मदत केली जाते, याचे प्रात्यक्षिक सोमवारी एसडीआरएफने करून दाखविले. निमित्त होते. फिल्ड क्राफ्ट ट्रॉफी स्पर्धेचे.
राज्य आपत्ती प्रतिसाद पथक महाराष्ट्र यांच्यामार्फत २०१६ पासून फिल्ड क्राफ्ट ट्रॉफी स्पर्धा आयोजित करण्यात येत आहे. सोमवारी सकाळी या स्पर्धेची सुरुवात राज्य राखीव पोलीस दल, हिंगणा रोड येथे झाली.
राज्य आपत्ती प्रतिसाद दल, मुख्यालय येथे उपमहानिरीक्षक महेश घुर्ये यांच्या अध्यक्षतेखाली राज्य आपत्ती दलाचे सहाय्यक समादेशक प्रमोद लोखंडे व त्यांच्या चमूने उत्कृष्टरित्या प्रात्यक्षिकांद्वारे क्राफ्ट ट्रॉफी स्पर्धा-२०२१ चे सादरीकरण केले. प्रात्यक्षिकांचे मूल्यांकन राज्य राखीव बल गट क्र. १३ चे समादेशक डॉ. पवन बन्सोड, राष्ट्रीय आपत्ती प्रतिसाद दलाचे उप समादेशक कमलेश डौनिडयाल, निरीक्षक महेंद्र कुमार, अमित कुमार यांनी केले. जिल्हा आपत्ती व्यवस्थापन प्राधिकरणचे अंकुश गावंडे, राज्य राखीव पोलीस बल गट क्र. ४, १३ व १५ तसेच राज्य आपत्ती प्रतिसाद दल नागपूर कार्यालयातील पोलीस अधिकारी, अमलदार व स्थानिक नागरिक यावेळी उपस्थित होते.