शौचखड्ड्यातून हरीण सहीसलामत!

उमरेड : जंगल परिसरातून भटकंती करीत अचानकपणे शौचखड्ड्यातील घाणीत हरीण (चौशिंगा) अडकले. सोमवारी १४ फेब्रुवारीला हा प्रकार घडला. दिवसभर हे हरीण बाहेर निघण्यासाठी तडफडत होते. ही बाब उत्तर उमरेडचे वनपरिक्षेत्राधिकारी (एफडीसीएम) रवी रोटे यांना मंगळवारी (दि. १५) कळताच त्यांनी लागलीच घटनास्थळ गाठले. बऱ्याच प्रयत्नानंतर त्यांनी सहकारी कर्मचाऱ्यांच्या माध्यमातून शौचखड्ड्यातून हरीण सहीसलामत बाहेर काढले. उमरेड शहरातील संपूर्ण घाण भिवापूर मार्गावरील परिसरात फेकली जाते. या शौचखड्ड्यामध्ये चौशिंगा वन्यजीव फसला. दिवसभर तो बाहेर निघण्यासाठी धडपड करीत होता. घाणीत सापडल्याने कुणीही त्याला बाहेर काढण्यास धजावत नव्हते. अशावेळी रवी रोटे यांनी वनरक्षक डी. यू. शिंगटे यांच्या मदतीने फसलेल्या हरणाला बाहेर काढले. कोणतेही साहित्य नसताना त्यांनी केलेली हिंमत नक्कीच वन्यप्रेमींना प्रेरणा देणारी असल्याची प्रतिक्रिया सुहास बोकडे यांनी व्यक्त केली.