चंद्रपूर: तेंदूपत्ता गोळा करण्यासाठी गेलेल्या देवराववर वाघाने अचानक हल्ला चढविला. त्यानेही हिंमत न हारता वाघाशी झुंज दिली. यात तो गंभीर जखमी झाला खरा; पण त्याने वाघाला पिटाळून लावले. त्यानंतर मरणासन्न अवस्थेत गावात आल्यानंतर देवरावचा मृत्यू झाला. घटना येथून जवळच असलेल्या मामला गावाजवळ घडली. देवराव रामसुर गावंडे (३५) रा. मुंगरमेंढा (सिंदेवाही) असे मृत मजुराचे नाव आहे. या घटनेने परिसरात दहशत पसरली आहे. मागील काही दिवसांपासून तेंदूपत्ता संकलनाचे काम सुरु आहे. यामुळे मोठ्या प्रमामात मजूर जंगल परिसरात तेंदू संकलन करण्यासाठी जातात. सिंदेवाही तालुक्यातील देवराव हा आपल्या सहकार्‍यांसह चंद्रपूर येथून जवळच असलेल्या मामला या गावामध्ये तेंदुपत्ता तोडाईसाठी आला होता. दररोज तेंदूसंकलन करण्याचे काम सुरू होते. नेहमीप्रमाणे शनिवारी दुपारी ४ वाजताच्या दरम्यान देवराव जंगलात तेंदूपत्ता तोडण्यासाठी जंगलात गेला असता त्याच्यावर वाघाने हल्ला केला. वाघासोबत तब्बल पंधरा मिनीटांपर्यंत त्याने झुंज दिली. वाघ पळून गेला. मात्र देवराव गंभीर जखमी झाला. अशाही जखमी अवस्थेत रक्तबंबाळ स्थितीत तो गावात एकटाच कसाबसा चालत आला. मात्र गावात पोहचताच काही वेळातच त्याने प्राण सोडला. घटनेची माहिती वनविभागाला मिळताच वनविभागाने पंचनामा करून उत्तरीय तपासणीसाठी त्याचा मृतदेह जिल्हा सामान्य रुग्णालयात पाठविला. देवराववर हल्ला करणारा प्राणी वाघ होता की बिबट्या हे अद्याप निश्चित नाही. उत्तरीय तपासणीनंतर आणि घटनास्थळावरील पहाणीनंतरच हे स्पष्ट होणार आहे. (नगर प्र्रतिनिधी)
वाघाशी झुंज दिल्यानंतर तेंदूपत्ता मजुराचा मृत्यू
By admin | Updated: May 18, 2014 01:04 IST