नागपूर : कोरोनामुळे हॉस्पिटलमध्ये दाखल असलेल्या आणि नंतर मृत झालेल्या आईच्या कानातील दागिने चोरीला गेल्याची तक्रार आतिश निर्गुण गजभिये (वय ४०, रा. दौलामेटी) यांनी तहसील पोलिसांकडे नोंदवली.
विशेष म्हणजे, तहसील पोलिसांनी मंगळवारी दोन भामट्यांना अटक केली. ते कोरोनामुळे दगावलेल्या मृतांच्या शरिरावरचे दागिने, रोख रक्कम आणि मोबाईल लंपास करत होते. त्यांनीच ही चोरी केली असावी, असा संशय आहे. पोलीस अधिक तपास करत आहेत.
----
प्रतापनगरात घरफोडी
नागपूर : प्रतापनगर पोलीस ठाण्याच्या हद्दीतील स्वावलंबी नगरात राहणाऱ्या आदिती अनिल गोडबोले यांच्या दाराचे कुलूप तोडून चोरट्यांनी सोन्याचे दागिने, हिरे, घड्याळ आणि महत्त्वपूर्ण कागदपत्रे असा दोन लाख ३५ हजार रुपयांचा मुद्देमाल चोरून नेला. गुरुवारी सकाळी ही चोरीची घटना लक्षात आल्यानंतर गोडबोले यांनी प्रतापनगर ठाण्यात तक्रार नोंदवली. पोलिसांनी चोरीचा गुन्हा दाखल केला असून, चोरट्यांचा शोध घेतला जात आहे.
---
क्षुल्लक कारणावरून पत्नीवर हल्ला
नागपूर : क्षुल्लक कारणावरून पत्नीवर प्राणघातक हल्ला करून तिला जखमी करणाऱ्या नवऱ्याविरुद्ध लकडगंज पोलिसांनी गुन्हा दाखल केला आहे. रामचंद्र बिसन चकोले (वय ४५) असे आरोपीचे नाव असून, तो हरिहर नगर गरोबा मैदानजवळ राहतो. त्याची पत्नी मुक्ता चकोले यांनी दार व्यवस्थित लावले नसल्याच्या कारणावरून गुरुवारी सकाळी ७.३० वाजता आरोपीने वाद घातला. त्यानंतर पत्नीला मारहाण केली. नंतर तिच्या पायावर चाकूने वार करून जबर दुखापत केली. यावेळी शेजारी मदतीला धावल्यामुळे पुढील धोका टळला. मुक्ता यांनी दिलेल्या तक्रारीवरून लकडगंज पोलिसांनी कलम ३२६, ३२६, ५०६ अन्वये गुन्हा दाखल केला असून, पुढील तपास सुरू आहे.
---