नागपूर : काही आरोपींनी जुन्या शत्रुत्वातून हल्ला करून एका विद्यार्थिनीसह तिघांना जखमी केले. ही घटना शनिवारी सायंकाळी ७ च्या सुमारास अंबाझरीतील हिलटॉप परिसरात घडली.
पोलीस तक्रारीनुसार, रिदम श्याम काळे (१७) ही मित्र शिवांग तिवारी, श्रावणी मडावी व सौम्या अय्यर यांच्यासोबत हिलटॉप परिसरातील फुटपाथवर बसली होती. दरम्यान, आरोपी निखिल रेड्डी हा सात-आठ साथीदारांसोबत तेथे पोहोचला. त्यांनी जुन्या शत्रुत्वातून रिदमला काठीने मारहाण केली. शिवांग व श्रावणी रिदमला वाचवण्यासाठी गेले असता त्यांनाही मारहाण करण्यात आली. अंबाझरी पोलिसांनी आरोपींविरुद्ध गुन्हा नोंदवून तपास सुरू केला आहे.
---------------
शांतीनगरात अ‍ॅक्टिव्हा पेटवली
नागपूर : काही अज्ञात आरोपींनी शांतीनगर येथे एक अ‍ॅक्टिव्हा दुचाकी पेटवली. ही घटना शनिवारी रात्री घडली. झाडे चौक येथील फिर्यादी सूरज विठोबा बर्डीकर यांनी घरापुढे अ‍ॅक्टिव्हा उभी केली होती. दरम्यान, अज्ञात आरोपींनी अ‍ॅक्टिव्हाला आग लावली. शांतीनगर पोलिसांनी आरोपींविरुद्ध गुन्हा नोंदवला आहे. आरोपींचा शोध घेतला जात आहे.
--------------
दारुड्या पतीचा पत्नीवर हल्ला
नागपूर : एमआयडीसी येथील दारुड्या पतीने पत्नीला काठीने जबर मारहाण केली. ही घटना शनिवारी मध्यरात्रीनंतर २ च्या सुमारास घडली.
विनोद सिरसाट (४९) असे आरोपीचे नाव असून तो रमाबाई आंबेडकरनगर येथील रहिवासी आहे. पत्नीचे नाव मीना आहे. विनोद दारू पिऊन घरी आला. त्याने मीनाला भोजन वाढायला सांगितले. त्यानंतर तो मीनाला शिवीगाळ करायला लागला, तसेच त्याने मीनाला मारहाण केली. एमआयडीसी पोलिसांनी आरोपीविरुद्ध गुन्हा नोंदवला आहे.
-------------
भोजनासाठी मित्रावर प्राणघातक हल्ला
नागपूर : भोजन तयार केले नाही म्हणून एका युवकाने मित्रावर काठीने प्राणघातक हल्ला केला.
संतोष ऊर्फ मायकल यादव (३५) असे आरोपीचे, तर चक्रधर घाटे (३५) असे जखमीचे नाव आहे. दोघेही डिप्टी सिग्नल परिसरात एकत्र राहतात. ते भोजनाचा खर्च अर्धा-अर्धा वाटून घेतात; परंतु संतोषने पैसे न दिल्यामुळे चक्रधरने भोजन तयार केले नाही. त्यामुळे संतोष संतापला. त्याने शुक्रवारी रात्री चक्रधरला काठीने मारहाण केली व फरार झाला. आरोपीविरुद्ध कळमना पोलिसांनी गुन्हा नोंदवला आहे. पुढील तपास सुरू आहे.