पारशिवनी : वाघाने चढविलेल्या हल्ल्यात एक गाय ठार झाली असून, बैल जखमी झाला. ही घटना ढवलापूर (ता. पारशिवनी) शिवारात शनिवारी (दि. १८) दुपारी घडली. या शिवारात वाघाने गुराची शिकार केल्याची ही दुसरी घटना हाेय. या घटनेमुळे भीतीचे वातावरण निर्माण झाले आहे.
हा शिवार पेंच व्याघ्र प्रकल्पाच्या नागलवाडी रेंज अंतर्गत येत असून, हा शिवार बफर झोनमध्ये येताे. परमेश्वर दयाराम उईके, रा. ढवलापूर (सावंगी) यांनी त्यांची गुरे त्यांच्याच शेताच्या धुऱ्यावर चरायला साेडली हाेती. त्याचा मुलगा हर्षल गुरांवर लक्ष ठेऊन हाेता. दुपारी १२ वाजताच्या सुमारास वाघाने जाेडीतील बैलासह गायीवर झडप घातली. हर्षलने परिसरातील शेतकऱ्यांना आवाज देऊन बाेलावले. त्यामुळे जखमी बैल व गाय वाघाच्या तावडीतून सुटले. मात्र, जखमी गायीचा काही वेळात मृत्यू झाला. वनविभागाने मृत गाईची १५ हजार रुपये तर जखमी बैलाची १० हजार रुपये नुकसान भरपाई द्यावी, अशी मागणी शेतकऱ्यांनी केली आहे.